جاڭا بولمە تابيعات كورىنىستەرىنەن تۇرادى. ونىڭ ىشىندە سۋ بۇرقاعى ورناتىلعان، بالالارعا ارنالعان اتكەنشەك پەن ورىندىقتار قويىلعان. ەرەكشە قاجەتتىلىگى بار ەم الاتىن بالالار قۇستاردىڭ داۋىسىن، سۋدىڭ سىلدىرىن ەستىپ، تابيعات اياسىندا جۇرگەندەي اسەر الادى.
جاڭا بولمە «ماڭعىستاۋمۇنايگاز» اق، «جەتىبايمۇنايگاز» وندىرىستىك مەكەمەسىنىڭ مۇنايشىلارىنىڭ دەمەۋشىلىگىمەن اشىلعانىن ايتا كەتۋىمىز كەرەك.
بالالاردىڭ بولاشاعى ءۇشىن مۇنايشىلار «ءبىر جاعادان باس، ءبىر جەڭنەن قول شىعارىپ» ءبىر كۇندىك جالاقىلارىن اۋدارىپ، جاڭا بولمەنى كەرەك-جاراقتارمەن جابدىقتاۋعا اتسالىسقان. ارنايى كابينەتتەگى دۇنيەلەردى مۇنايشىلاردىڭ وزدەرى جاساعان.
جەتىباي اۋىلىنىڭ مۇمكىندىگى شەكتەۋلى بالالارعا ارنالعان پسيحولوگيالىق-پەداگوگيكالىق تۇزەتۋ ورتالىعىندا بۇگىنگى تاڭدا ەم الىپ جاتقان 70 بالا بار. ءار بالاعا پسيحولوگ، سۋردوپەداگوگ، دەفەكتولوگ ماماندارى قاراستىرىلعان جانە ەمدىك-دەنەشىنىقتىرۋ بولمەسىمەن قامتىلعان.
ەم-شارالار ەكى اۋىسىمدا جۇرگىزىلەدى. تىرەك-قيمىلى ءالسىز بالالارعا ەمدىك ماسساج جاسالىپ، ارنايى قۇرال-جابدىقتارمەن بۇلدىرشىندەردىڭ بۇلشىق ەتتەرىن وياتۋ شاراسى جاسالادى.
