Jambyl oblysynda «Taza Qazaqstan» ekologiialyq aktsiiasy keń kólemde ótkizilýde. Aktsiia aiasynda oblystyń barlyq aýdandarynda qoǵamdyq oryndardy, kóshelerdi, bazarlar aýmaǵyn, sý aidyndarynyń jaǵalaýlaryn tazartý jumystary júrgizildi.
Is-sharalar ekologiialyq mádenietti arttyrý, órt qaýipsizdigin saqtaý, qoǵamdyq oryndardy, kósheler men sý aidyndaryn jinalǵan qoqystardan tazartýdy kózdeidi.
Aktsiia aiasynda birqatar tazalyq sharalary uiymdastyryldy.
Atap aitqanda, aǵymdaǵy jyldyń 7 shildesi kúni Sarysý aýdany aýmaǵynda qatty jaýyn-shashyn saldarynan kólbeý aǵyn qalyptasyp, birqatar kóshedegi 400-den astam úidiń aýlasy, 47 úidiń ishi men 1 mekteptiń jertólesin sý aldy. Aǵyn sýmen birge qyrdaǵy tal-daraqtar men qoqystar aýyl kóshelerin basyp qaldy. Osyǵan orai, «Taza Qazaqstan» aktsiiasy aiasynda qazaqtyń ejelgi saltymen «Asar» dástúri qolǵa alyndy. Iaǵni, Taraz qalasy, Jambyl, Jýaly, Baizaq jáne Talas aýdandarynyń eriktileri zardap shekken kóshelerge asarlatyp tazalaý jumystaryn júzege asyrdy. Oǵan 150-ge jýyq azamat qatysty.
– Aǵyn sýdyń saldarynan aýyldaǵy aǵaiynnyń ábigerge túskeni ras. Kóshe toly topyraq pen tal-daraqty tazalaý ońaiǵa soqqan joq. Osy oraida, qazaqtyń kóne dástúri negizinde asarlatyp kelip jatqan ózge aýdandaǵy baýyrlarymyzǵa alǵysymyzdy bildiremiz. Qandai qiyndyqty bolmasyn aýyz birshilikpen eńsergen elimizdiń bolashaǵy jarqyn bola bersin, — dedi Sarysý aýdandyq jastar ortalyǵynyń direktory Asyljan Pazylbekov.
Sonymen birge bastaýyn Qyrǵyz elinen alatyn Talas ózeniniń jaǵalaýyn qoqystardan tazartý jumystaryna volonterler tartyldy. «Jastar Taza Qazaqstan úshin!» ekologiialyq aktsiiasyna 200-den astam erikti qatysty. Olar jaǵalaýdaǵy shashylyp jatqan plastik qaldyqtardy jinap, 400 qap qoqysty arnaiy orynǵa aparyp tókti.
Sonymen qatar Taraz qalasynyń «Kóktem» alqabynda, Baizaq, Qordai, Sarysý aýdandaryndaǵy oblystyq jáne aýdandyq mańyzy bar joldardyń boiynda, saiabaqtar men ortalyq kóshelerde qýraǵan shópterdi shabý jumystary ótkizildi.
Turǵyndar arasynda tazalyq mádenietin artyrý maqsatynda belsendi azamattardyń, volonterlerdiń bastamasymen Taraz qalasyndaǵy Talas ózeni, Jýaly aýdanyndaǵy Teris ózeni, «Teris-Ashybulaq» sý qoimasynyń Nurlykent, Qyzylaryq aýyldaryndaǵy jaǵalaýlary qoqystardan tazartylyp, belsendi qatysýshylar marapattaldy.
Sonymen birge Jambyl aýdany, Asa aýylynda volonterler arasynda konkýrs, Talas aýdanynda «Taza kóshe», «Taza aýla» baiqaýlary ótkizildi. Konkýrstarǵa aýla turǵyndary qatysyp, belgilengen aýlalar synǵa tústi. Jeńimpazdar baǵaly syilyqtarmen marapattaldy.
Baizaq aýdanynyń Qostóbe jáne Sarykemer aýyldyq okrýgteriniń aýmaǵynda belsendi azamattar, eriktiler, depýtattar Taraz-Sarykemer jolynyń boiy, jaiaý júrginshiler joldaryn tazalaý, kógaldardy shabý jumystaryn júrgizdi.
Eriktiler men jergilikti turǵyndar bazar aýmaǵyn qoqystan tazartyp, jol boiyndaǵy jáne saýda oryndaryndaǵy aimaqtardy retke keltirdi. Sondai-aq qatysýshylar bazar mańaiyndaǵy jasyl jelekterdi sýǵaryp, aǵashtar men gúlderdi retke keltirý jumystaryn atqardy.
Jalpy, «Taza Qazaqstan» respýblikalyq aktsiiasy aiasynda aýqymdy jumystar atqarylyp, oǵan 500 myńnan asa jambyldyq belsendi qatysqan. Onyń ishinde, turǵyndar, ardagerler men jastar, ÚEU ókilderi jáne túrli mekeme qyzmetkerleri bar.
Aktsiia aiasynda 320 myń m² áýejai, temirjol, avtobeketter men avtobýs parkteriniń, 206 myń m² otyn-energetika keshenderiniń, 108 myń m² emdeý ortalyqtarynyń, 508 myń m² oqý oryndarynyń, 280 myń m² shaǵyn jáne orta kásiporyndardyń aýmaqtary kúl-qoqystan tazartyldy. 818 shq kanal men aryq júiesi, 125 myń turǵyn úi aýlasy jáne 4,5 myń shq kóshe tazalandy. 60 myńǵa jýyq kóshet otyrǵyzyldy. 2,4 myń aǵash butalanyp, 455 myń m² jasyl jelek sýǵaryldy.
Budan bólek, 60 tarihi-mádeni eskertkish pen 143 saiabaq, skver aýmaǵyna turaqty túrde tazalyq jumystary júrgizilýde.
12 myń tonna qoqys shyǵaryldy. Tazalyq jumystaryna 910 birlik tehnika tartyldy.
