Áleýmettik jelide Jambyl oblysynda 14 jastaǵy qyz júkti ekeni týraly aqparat tarady, dep habarlaidy Dalanews.kz.
Mán-jaiy
Málimetke súiensek, oqiǵa Qordai aýdanynda bolǵan. Onyń otbasynyń aitýynsha, 14 jastaǵy múgedektigi bar qyzdy áldekimder eki ret urlap, jynystyq zorlyq-zombylyqqa ushyratqan, sonyń saldarynan qyz júkti bolyp qalǵan. Anasynyń aitýynsha, quqyq qorǵaý organdaryna aryz túsken kezde qyzdy úshinshi ret urlap áketip, qaitadan zorlyq-zombylyqqa ushyratqan.
"Menen basqa kimiń bar qaraityn saǵan?! Kishkene shyda endi aman-saý bosanyp alamyn degenshe. Osy ýaqytqa deiin shydadyń ǵoi. Aman-saý bosanyp al, Alla taǵalam kómektes", - videoda qyzdyń anasy.
Politsiia pikiri
Jambyl oblysy Politsiia departamenti jaǵdaiǵa pikir bildirdi.
"Kámeletke tolmaǵan qyzyna qatysty zańsyz áreketter týraly anasynyń aryzy boiynsha politsiia dereý sotaldy tergep-tekserýdi bastady. Kúdikti jedel anyqtalyp, politsiia bólimshesine jetkizildi. Qazir tergeý jáne protsessýaldyq is-áreketter júrgizilip jatyr. Qylmystyq iske qatysýshylardyń barlyq jaýaby tekserilip, dálelder jinalyp jatyr", - dep jazylǵan habarlamada.
Politsiia málimetinshe, tolyq jáne jan-jaqty tergep-tekserý nátijesi boiynsha zańdy sheshim qabyldanady.
Bilim basqarmasy ne deidi?
Jambyl oblysy ákimdiginiń Bilim basqarmasy málimetinshe, tergeý barysynda jasóspirim "jeńil dárejedegi aqyl-oi kemistigi" diagnozymen úiden oqytylatyn bala ekeni anyqtalǵan.
"Qazir mekteptiń psihologiialyq-pedagogikalyq qoldaý jumysyn kúsheitý, qamqorshylyq organy jáne politsiiamen birlesken baqylaýdy arttyrý, jasóspirimniń otbasymen áleýmettik jumysty uiymdastyrý baǵytyndaǵy jumystar atqarylyp jatyr. Kámeletke tolmaǵandardyń quqyqtary men qaýipsizdigin qorǵaý baǵytyndaǵy sharalar qatań baqylaýǵa alyndy. Sotqa deiingi tergeý nátijeleri boiynsha zańǵa sáikes tiisti sheshimder qabyldanady. Ózge málimetter tergeý múddesine sáikes jariialanbaidy", - dep jazylǵan habarlamada.
