الەۋمەتتىك جەلىدە جامبىل وبلىسىندا 14 جاستاعى قىز جۇكتى ەكەنى تۋرالى اقپارات تارادى، دەپ حابارلايدى Dalanews.kz.
ءمان-جايى
مالىمەتكە سۇيەنسەك، وقيعا قورداي اۋدانىندا بولعان. ونىڭ وتباسىنىڭ ايتۋىنشا، 14 جاستاعى مۇگەدەكتىگى بار قىزدى الدەكىمدەر ەكى رەت ۇرلاپ، جىنىستىق زورلىق-زومبىلىققا ۇشىراتقان، سونىڭ سالدارىنان قىز جۇكتى بولىپ قالعان. اناسىنىڭ ايتۋىنشا، قۇقىق قورعاۋ ورگاندارىنا ارىز تۇسكەن كەزدە قىزدى ءۇشىنشى رەت ۇرلاپ اكەتىپ، قايتادان زورلىق-زومبىلىققا ۇشىراتقان.
"مەنەن باسقا كىمىڭ بار قارايتىن ساعان؟! كىشكەنە شىدا ەندى امان-ساۋ بوسانىپ الامىن دەگەنشە. وسى ۋاقىتقا دەيىن شىدادىڭ عوي. امان-ساۋ بوسانىپ ال، اللا تاعالام كومەكتەس"، - ۆيدەودا قىزدىڭ اناسى.
پوليسيا پىكىرى
جامبىل وبلىسى پوليسيا دەپارتامەنتى جاعدايعا پىكىر ءبىلدىردى.
"كامەلەتكە تولماعان قىزىنا قاتىستى زاڭسىز ارەكەتتەر تۋرالى اناسىنىڭ ارىزى بويىنشا پوليسيا دەرەۋ سوتالدى تەرگەپ-تەكسەرۋدى باستادى. كۇدىكتى جەدەل انىقتالىپ، پوليسيا بولىمشەسىنە جەتكىزىلدى. ءقازىر تەرگەۋ جانە پروسەسسۋالدىق ىس-ارەكەتتەر جۇرگىزىلىپ جاتىر. قىلمىستىق ىسكە قاتىسۋشىلاردىڭ بارلىق جاۋابى تەكسەرىلىپ، دالەلدەر جينالىپ جاتىر"، - دەپ جازىلعان حابارلامادا.
پوليسيا مالىمەتىنشە، تولىق جانە جان-جاقتى تەرگەپ-تەكسەرۋ ناتيجەسى بويىنشا زاڭدى شەشىم قابىلدانادى.
ءبىلىم باسقارماسى نە دەيدى؟
جامبىل وبلىسى اكىمدىگىنىڭ ءبىلىم باسقارماسى مالىمەتىنشە، تەرگەۋ بارىسىندا ءجاسوسپىرىم "جەڭىل دارەجەدەگى اقىل-وي كەمىستىگى" دياگنوزىمەن ۇيدەن وقىتىلاتىن بالا ەكەنى انىقتالعان.
"ءقازىر مەكتەپتىڭ پسيحولوگيالىق-پەداگوگيكالىق قولداۋ جۇمىسىن كۇشەيتۋ، قامقورشىلىق ورگانى جانە پوليسيامەن بىرلەسكەن باقىلاۋدى ارتتىرۋ، ءجاسوسپىرىمنىڭ وتباسىمەن الەۋمەتتىك جۇمىستى ۇيىمداستىرۋ باعىتىنداعى جۇمىستار اتقارىلىپ جاتىر. كامەلەتكە تولماعانداردىڭ قۇقىقتارى مەن قاۋىپسىزدىگىن قورعاۋ باعىتىنداعى شارالار قاتاڭ باقىلاۋعا الىندى. سوتقا دەيىنگى تەرگەۋ ناتيجەلەرى بويىنشا زاڭعا سايكەس ءتيىستى شەشىمدەر قابىلدانادى. وزگە مالىمەتتەر تەرگەۋ مۇددەسىنە سايكەس جاريالانبايدى"، - دەپ جازىلعان حابارلامادا.
