Qazaqstannyń Kásibı boks federasıasy Jánibek Álimhanulyna qatysty jaǵdaı boıynsha resmı málimdeme jasady, dep habarlaıdy Dalanews.kz.

Federasıa ókilderiniń aıtýynsha, sportshy isi aıasynda V synamasyn ashý zańdyq turǵydan sheshýshi kezeń bolyp sanalady. Bul tek boksshynyń mansabyna ǵana emes, iske qatysy bar barlyq taraptyń áreketterine quqyqtyq baǵa berýge tikeleı áser etedi.

Málimdemede Qazaqstannyń Kásibı boks federasıasy halyqaralyq sport quqyǵynyń negizgi qaǵıdattaryn, atap aıtqanda kinásizdik prezýmpsıasyn, prosestik adaldyqty jáne reglamentterdiń qatań saqtalýyn ustanatyny atap ótilgen.

Federasıa V synamasynyń resmı nátıjeleri jarıalanǵanǵa deıin Jánibek Álimhanuly zańdy túrde kinásiz dep sanalatynyn eske saldy. Osyǵan baılanysty aıyptaýshy sıpattaǵy kez kelgen jarıa málimdemeler prosestiń ádildigine qysym kórsetý jáne sportshynyń quqyqtaryn buzý retinde baǵalanatyny aıtyldy.

Sondaı-aq V synamasyn ashý men taldaý bekitilgen rásimderge tolyq sáıkes júrgizilýi, al sportshy men onyń ókilderi prosestiń barlyq kezeńderi men nátıjelerine qol jetkizýi tıis ekeni talap etiledi. Reglamentten kez kelgen aýytqý nátıjelerdi jaramsyz dep tanýǵa negiz bolýy múmkin.

Federasıa Jánibek Álimhanulyn tirkelgen kásibı boksshy retinde qorǵaýdy jalǵastyratynyn jáne onyń quqyqtary men bedelin qorǵaý úshin barlyq zańdy tetikterdi qoldanatynyn málimdedi. Eger V synamasy taza dep tanylsa, barlyq aıyptaýlardy resmı túrde alyp tastaý, sportshynyń bedelin jarıa túrde qalpyna keltirý jáne is barysynda jasalǵan áreketterge quqyqtyq baǵa berý talap etiledi.

Al eger buzýshylyqtar zańdy ári dáleldi túrde anyqtalsa, federasıa sheshimderdi qoldanystaǵy reglamentter aıasynda qabyldaıtynyn habarlady.

Málimdeme sońynda federasıa ókilderi basty qaǵıda emosıa emes, quqyq ekenin atap ótip, tek zańǵa saı alynǵan V synamasynyń nátıjesi ǵana túpkilikti qorytyndy jasaýǵa negiz bolatynyn jetkizdi.