Sonyń ishinde Eýraziialyq odaqqa qosylǵan Qazaqstandy Reseiden teris ainytyp, odaq quramynan shyǵýǵa úgitteidi.
"AQSh Eýraziialyq odaqty ydyratý úshin aqparattyq soǵystyń eń las túrin paidalanýdan taiynbaidy. Uiymnyń qyzyǵyn orystar ǵana kórip otyrǵanyn aityp, odaqqa múshe elderdiń arasyna ot salady ", – deidi Sultanov.
Sói degen ol aqparattyq propagandada AQSh-tan asyp túsken, Qazaqstannyń táýelsizdigine til tigizip, shekaralyq aimaqtaryna suqtanǵan Reseidiń saiasatyn sóz etýdi "umytyp" ketipti.
Aitýynsha Ýkrainany Kremlden ajyratyp, tutas ulttyń sanasyn ulaǵan da Amerika. Aq úidiń suǵanaq saiasaty saldarynan bir kezdegi baýyrlas elder qazir itshe yryldasyp otyr.
Al bilikke kelgen Baiden Eýraziialyq odaqty taratyp, Kremldi kúiretip tynýdy kókseidi. Odaqtyń qulashyn keńge jaiýyna jol bermeidi. Pýtinniń osy baǵytty tábetin tájep, tizgin tartýǵa májbúrleidi.
"Pýtin Baidenge baǵynbaidy, biraq. AQSh-tyń oilaǵany oryndalmai, taýy shaǵylady. Bul úshin Beijińmen til tabysyp, Amerikaǵa qarsy ujymdasa kúresý kerek. Batys pen AQSh Eýraziialyq odaqqa kirgen elderdiń ishki isinde shataǵy bolmasyn. Navalnyi? Onda nesi bar? Navalnyi olardyń eki týyp, bir qalǵany ma?!", – deidi Bolat myrza.
Ashyǵyn aitqanda adam quqyǵyn aiaqqa taptap otyrǵan Reseidiń kez-kelgen áreketin aqtap almaq bolady. Sultanovtyń aitýynsha sailaý kezinde Qazaqstan men Reseidi aiyptaýdan aldyna jan salmaityn Amerikanyń syrty bútin, ishi tútin.
"AQSh áli kúnge ólim jazasynan bas tartqan joq. Kórdińizder me, bul el gýmanizmdi besiginde tunshyqtyrǵan. Al bizdiń el budan baiaǵyda bas tartqan. Sailaýǵa kelgende bizge aqyl aityp, kósemsimesin. EQYU-nyń ókilderin sailaý ýchaskilerine kirgizbei zar qylady", – deidi ol.
Qaidan, kimnen estigeni belgisiz, Sultanov Baidenniń Kremldi kúiretý, Eýraziialyq odaqty ydyratýǵa qatysty josparyn bilip qoiypty. Aitýynsha, munyń bir amaly - osy odaqqa jan-tánimen qarsy ultshyldardy qoldaý. Amerika Orta Aziiadaǵy ultshyldyqty qozdyryp, KSRO-ny kórmegen keiingi býyndy Reseige qarsy qoiady.
"Qazaqstan men Reseidiń arazdastyrý úshin KSRO-ny zulymdyq imperiiasy dep qabyldaityn, Máskeýdi onyń izbasary dep tanityn "adasqan" jastardy arandatady. Táýelsizdik alǵaly beri Qazaqstanǵa álemniń ár túpkirinen 1 mln-nan asa oralman kóship keldi. Baidenniń propaganda quraldary oralmandardyń miyn ainaldyryp, Kremldi qubyjyq qylyp kórsetýge tyrysady...", – degen Sultanov bul terminniń áldeqashan kónergeninen, Toqaevtyń buiryǵymen "oralman" ataýy "qandas" dep ózgergeninen habarsyz qalsa kerek.
Ázirlegen Dýman BYQAI
