سونىڭ ٸشٸندە ەۋرازييالىق وداققا قوسىلعان قازاقستاندى رەسەيدەن تەرٸس اينىتىپ, وداق قۇرامىنان شىعۋعا ٷگٸتتەيدٸ.
"اقش ەۋرازييالىق وداقتى ىدىراتۋ ٷشٸن اقپاراتتىق سوعىستىڭ ەڭ لاس تٷرٸن پايدالانۋدان تايىنبايدى. ۇيىمنىڭ قىزىعىن ورىستار عانا كٶرٸپ وتىرعانىن ايتىپ, وداققا مٷشە ەلدەردٸڭ اراسىنا وت سالادى ", – دەيدٸ سۇلتانوۆ.
سٶي دەگەن ول اقپاراتتىق پروپاگاندادا اقش-تان اسىپ تٷسكەن, قازاقستاننىڭ تەۋەلسٸزدٸگٸنە تٸل تيگٸزٸپ, شەكارالىق ايماقتارىنا سۇقتانعان رەسەيدٸڭ ساياساتىن سٶز ەتۋدٸ "ۇمىتىپ" كەتٸپتٸ.
ايتۋىنشا ۋكراينانى كرەملدەن اجىراتىپ, تۇتاس ۇلتتىڭ ساناسىن ۇلاعان دا امەريكا. اق ٷيدٸڭ سۇعاناق ساياساتى سالدارىنان بٸر كەزدەگٸ باۋىرلاس ەلدەر قازٸر يتشە ىرىلداسىپ وتىر.
ال بيلٸككە كەلگەن بايدەن ەۋرازييالىق وداقتى تاراتىپ, كرەملدٸ كٷيرەتٸپ تىنۋدى كٶكسەيدٸ. وداقتىڭ قۇلاشىن كەڭگە جايۋىنا جول بەرمەيدٸ. پۋتيننٸڭ وسى باعىتتى تەبەتٸن تەجەپ, تٸزگٸن تارتۋعا مەجبٷرلەيدٸ.
"پۋتين بايدەنگە باعىنبايدى, بٸراق. اقش-تىڭ ويلاعانى ورىندالماي, تاۋى شاعىلادى. بۇل ٷشٸن بەيجٸڭمەن تٸل تابىسىپ, امەريكاعا قارسى ۇجىمداسا كٷرەسۋ كەرەك. باتىس پەن اقش ەۋرازييالىق وداققا كٸرگەن ەلدەردٸڭ ٸشكٸ ٸسٸندە شاتاعى بولماسىن. ناۆالنىي? وندا نەسٸ بار? ناۆالنىي ولاردىڭ ەكٸ تۋىپ, بٸر قالعانى ما?!", – دەيدٸ بولات مىرزا.
اشىعىن ايتقاندا ادام قۇقىعىن اياققا تاپتاپ وتىرعان رەسەيدٸڭ كەز-كەلگەن ەرەكەتٸن اقتاپ الماق بولادى. سۇلتانوۆتىڭ ايتۋىنشا سايلاۋ كەزٸندە قازاقستان مەن رەسەيدٸ ايىپتاۋدان الدىنا جان سالمايتىن امەريكانىڭ سىرتى بٷتٸن, ٸشٸ تٷتٸن.
"اقش ەلٸ كٷنگە ٶلٸم جازاسىنان باس تارتقان جوق. كٶردٸڭٸزدەر مە, بۇل ەل گۋمانيزمدٸ بەسٸگٸندە تۇنشىقتىرعان. ال بٸزدٸڭ ەل بۇدان باياعىدا باس تارتقان. سايلاۋعا كەلگەندە بٸزگە اقىل ايتىپ, كٶسەمسٸمەسٸن. ەقىۇ-نىڭ ٶكٸلدەرٸن سايلاۋ ۋچاسكٸلەرٸنە كٸرگٸزبەي زار قىلادى", – دەيدٸ ول.
قايدان, كٸمنەن ەستٸگەنٸ بەلگٸسٸز, سۇلتانوۆ بايدەننٸڭ كرەملدٸ كٷيرەتۋ, ەۋرازييالىق وداقتى ىدىراتۋعا قاتىستى جوسپارىن بٸلٸپ قويىپتى. ايتۋىنشا, مۇنىڭ بٸر امالى - وسى وداققا جان-تەنٸمەن قارسى ۇلتشىلداردى قولداۋ. امەريكا ورتا ازيياداعى ۇلتشىلدىقتى قوزدىرىپ, كسرو-نى كٶرمەگەن كەيٸنگٸ بۋىندى رەسەيگە قارسى قويادى.
"قازاقستان مەن رەسەيدٸڭ ارازداستىرۋ ٷشٸن كسرو-نى زۇلىمدىق يمپەريياسى دەپ قابىلدايتىن, مەسكەۋدٸ ونىڭ ٸزباسارى دەپ تانيتىن "اداسقان" جاستاردى ارانداتادى. تەۋەلسٸزدٸك العالى بەرٸ قازاقستانعا ەلەمنٸڭ ەر تٷپكٸرٸنەن 1 ملن-نان اسا ورالمان كٶشٸپ كەلدٸ. بايدەننٸڭ پروپاگاندا قۇرالدارى ورالمانداردىڭ ميىن اينالدىرىپ, كرەملدٸ قۇبىجىق قىلىپ كٶرسەتۋگە تىرىسادى...", – دەگەن سۇلتانوۆ بۇل تەرميننٸڭ ەلدەقاشان كٶنەرگەنٸنەن, توقاەۆتىڭ بۇيرىعىمەن "ورالمان" اتاۋى "قانداس" دەپ ٶزگەرگەنٸنەن حابارسىز قالسا كەرەك.
ەزٸرلەگەن دۋمان بىقاي
