قازاقستاندىقتاردىڭ جارتىسىنان استامىندا كٷتپەگەن شىعىنعا جۇمسايتىن جيناق جوق. ۇلتتىق بانك جٷرگٸزگەن ساۋالناماعا قاتىسۋشىلاردىڭ 58 پايىزى اقشا جينامايتىنىن ايتقان, دەپ حابارلايدى dalanews.kz.
زەرتتەۋ 2026 جىلعى قازاندا جٷرگٸزٸلگەن. وعان 18 جاستان اسقان 1,5 مىڭ ادام قاتىسقان. ساۋالناما نەتيجەسٸ بويىنشا رەسپوندەنتتەردٸڭ 28,8 پايىزىندا عانا جيناق بار.
قىركٷيەكتە جيناعى جوق تۇرعىنداردىڭ ٷلەسٸ 60,3 پايىز بولعان. بٸر ايدىڭ ٸشٸندە بۇل كٶرسەتكٸش 58 پايىزعا دەيٸن تٶمەندەگەن. الايدا ەل تۇرعىندارىنىڭ باسىم بٶلٸگٸندە ەلٸ دە قارجىلاي قور جوق.
ساۋالنامادا وتباسىلاردىڭ اي سايىنعى تابىسى دا زەرتتەلگەن. قاتىسۋشىلاردىڭ 30,4 پايىزى وتباسىنىڭ جالپى كٸرٸسٸ 150-300 مىڭ تەڭگە ارالىعىندا ەكەنٸن كٶرسەتكەن. تاعى 23,4 پايىزى ايىنا 300-500 مىڭ تەڭگە تابادى. ال وتباسىلىق تابىسى 500 مىڭ تەڭگەدەن اساتىنداردىڭ ٷلەسٸ 13,8 پايىزدى قۇراعان.
رەسپوندەنتتەردٸڭ 12,9 پايىزى وتباسىنىڭ ايلىق تابىسى 100-150 مىڭ تەڭگە ارالىعىندا ەكەنٸن ايتقان. قاتىسۋشىلاردىڭ شامامەن 15 پايىزى ايىنا 100 مىڭ تەڭگەدەن از قاراجاتقا كٷن كٶرەدٸ.
زەرتتەۋ تۇرعىنداردىڭ قارجىلاي جاعدايى قالاي ٶزگەرگەنٸن دە كٶرسەتتٸ. قاتىسۋشىلاردىڭ 48,9 پايىزى كەيٸنگٸ بٸر جىلدا تۇرمىسى بۇرىنعى دەڭگەيدە قالعانىن ايتقان. ال 31,3 پايىزى قارجىلىق جاعدايىنىڭ ناشارلاعانىن جەتكٸزگەن. تۇرمىسى جاقسارعانداردىڭ ٷلەسٸ 14,8 پايىز بولعان.
