Almatyda burynǵy eńbek jáne halyqty áleýmettik qorǵaý vitse-ministri Aqmadi Sarbasovqa qatysty sot úkimi shyqty. Ol para alǵany úshin tórt jylǵa bas bostandyǵynan aiyryldy. Al qyzmettik ókilettigin asyra paidalandy degen aiyp boiynsha aqtaldy, dep habarlaidy dalanews.kz.
Úkimdi búgin Almaty qalasynyń Almaly aýdandyq soty jariialady. Memlekettik Eńbek resýrstaryn damytý ortalyǵy men Birinshi kredittik biýro arasyndaǵy yntymaqtastyqqa qatysty qylmystyq is boiynsha barlyǵy bes adam sottaldy.
Atap aitqanda, Eńbek resýrstaryn damytý ortalyǵynyń burynǵy basshysy Dáýlet Arǵandyqov pen Birinshi kredittik biýronyń eks-basshysy Rýslan Omarov jeti jyl alty aiǵa bas bostandyǵynan aiyryldy. Sot olardy birneshe bap boiynsha, sonyń ishinde sybailas jemqorlyq qylmystary men ziiandy baǵdarlamalardy paidalaný derekteri boiynsha kináli dep tanydy. Alaida keibir aiyptar boiynsha ekeýi de aqtaldy.
Ortalyqtyń taǵy eki qyzmetkeri – Táýke Bolatbaev pen Aqjol Doshimov ziiandy baǵdarlamalardy paidalanǵany úshin úsh jylǵa sottaldy. Alaida raqymshylyq jasaý týraly zań qoldanylǵannan keiin olardyń jazasy eki jylǵa deiin qysqardy.
Rýslan Omarov pen Dáýlet Arǵandyqovqa memlekettik qyzmette jáne kvazimemlekettik sektorda ómir boiy jumys isteýge tyiym salyndy. Al Táýke Bolatbaev pen Aqjol Doshimov bir jyl boiy aqparattyq júielermen jumys istei almaidy.
Tórt sottalýshy sot zalynda qamaýǵa alyndy. Beseýi de jazasyn ortasha qaýipsizdik mekemelerinde óteidi. Sonymen qatar sot 75 myń AQSh dollaryn memleket kirisine tárkileý týraly sheshim shyǵardy.
Aita keteiik, Aqmadi Sarbasov bes jylǵa jýyq ýaqyt Eńbek jáne halyqty áleýmettik qorǵaý ministriniń birinshi orynbasary qyzmetin atqarǵan. 2025 jylǵy sáýirde ol Eńbek resýrstaryn damytý ortalyǵyn basqardy. Alaida birneshe aidan keiin oǵan qatysty tergeý bastaldy.
Eske salaiyq, tergeý nusqasy boiynsha, bul qarajat «Birinshi kredittik biýro» men Eńbek jáne halyqty áleýmettik qorǵaý ministrligine qarasty enshiles uiym - «Eńbek resýrstaryn damytý ortalyǵy» AQ arasyndaǵy yntymaqtastyqtyń zańsyz bóligi aiasynda berilgen. Bul uiym qazaqstandyqtardyń tabysy týraly barlyq málimetti jinaidy. Al mundai aqparat nesie berý kezinde klienttiń tólem qabiletin baǵalaý úshin asa mańyzdy sanalady. Bankter men qarapaiym azamattar bul málimetterdi «Birinshi kredittik biýro» jáne Memlekettik kredittik biýro arqyly alady.
Sonymen qatar, «Birinshi kredittik biýro» atalǵan ortalyqpen resmi túrde, qol qoiylǵan kelisimder negizinde jumys istegen. Biraq bul jaǵdaida ortalyq basshylyǵyna ne úshin para berilgeni tergeý barysynda basty suraqtardyń birine ainalǵan.
Qarjylyq monitoring agenttiginiń dereginshe, 2020 jyly ortalyqtyń sol kezdegi basshysy Dáýlet Arǵyndyqov «Birinshi kredittik biýronyń» bas direktory Rýslan Omarovpen zańsyz kelisim jasasqan. Sonyń nátijesinde jekemenshik kompaniia kórsetilgen qyzmetten túsken tabystyń 35 paiyzyna deiin alyp otyrǵan. Al dál osy salada jumys isteitin Memlekettik kredittik biýro 30 paiyz ǵana tabys taba alǵan. Tergeý málimetine súiensek, mundai kelisimniń kesirinen «Eńbek resýrstaryn damytý ortalyǵynyń» óz tabysy azaiǵan.
Sondai-aq Qarjylyq monitoring agenttigi Arǵyndyqov ortalyqqa suranystardy kidirissiz ári kóp kólemde óńdeýge múmkindik beretin aqparattyq servistiń ornatylýyn maquldady dep kúdiktenedi. Bir qaraǵanda, munda zańsyz eshteńe joq siiaqty.
Alaida tergeý nusqasyna sáikes, «Eńbek resýrstaryn damytý ortalyǵy» men Memlekettik kredittik biýrony bailanystyratyn aqparattyq arnalarǵa júieniń jumysyn baiaýlatatyn ziiandy baǵdarlama ádeii engizilgen. Sonyń saldarynan «Birinshi kredittik biýro» azamattardyń tólem qabileti týraly málimetti alýda basymdyqqa ie bolǵan. Demek, qyzmettiń jyldamdyǵyna bailanysty klientter osy biýroǵa kóbirek júgingen.
Iste ekinshi burynǵy vitse-ministr Aqmádi Sarbasovtyń da róli kórsetilgen. Ótken jyldyń kókteminde ol Dáýlet Arǵyndyqovtyń ornyna «Eńbek resýrstaryn damytý ortalyǵy» AQ prezidenti bolyp taǵaiyndalyp, aldyńǵy basshy bekitken sharttarmen «Birinshi kredittik biýro» basshylyǵymen jumysty jalǵastyrǵan. Tergeý málimetinshe, iri kólemdegi qolma-qol aqsha sonyń úshin berilgen.
Osyǵan bailanysty Aqmádi Sarbasovqa para alý jáne qyzmettik ókiletin asyra paidalaný baptary boiynsha aiyp taǵylǵan. Al onyń áriptesi Dáýlet Arǵyndyqovqa qyzmettik ókiletin asyra paidalaný, para berý jáne ziiandy baǵdarlamalyq jasaqtama ornatý aiyptary taǵylyp otyr. «Birinshi kredittik biýronyń» bas direktory Rýslan Omarovqa qyzmet babyn asyra paidalanýǵa qatysqany jáne para bergeni úshin aiyp taǵylǵan.
Quqyq qorǵaý organdarynyń esebinshe, ortalyqqa keltirilgen jalpy shyǵyn kólemi 2 milliard teńgege jetken. Qylmystyq is figýranttarynyń 1 milliard teńgeniń múlkine tyiym salynǵan.
