Qazaqstannyń qarjy sektorynda Eýraziialyq bank kózge birden túsetin bankterdiń biri, alaida ol búgingi tańda dúdamaldylyq jaǵdaiynda jumys isteýde. Syrttai qaraǵanda, bári jaqsy, bári turaqty: bank klientterge qyzmet kórsetip, jańa ónimder paida bolýda jáne tapqan paidasy týraly der kezinde esep berilýde. Biraq banktyń arǵy jaǵynda, iaǵni aktsionerler deńgeiinde ún-túnsiz "shaiqas" júrýde. Onda da bul teketires qarjy institýtynyń bolashaǵyn aiqyndaýshy bolyp tabylady. Bul týraly qarjyger Ǵalym Qusaiynov aitty, dep habarlaidy Dalanews.kz.
Qarjyger-maman Forbes.kz basylymyna bergen suqbatynda bul aradaǵy dúrdarazdyqqa bank basshylyǵyndaǵy býyndardyń almasý protsesi (muragerlik máselesi) túrtki ekenin aitty.
Banktiń úsh quryltaishysynyń ekeýi ómirden ótkennen keiin olardyń úlesteri muragerlerine ótti, al olardyń banktiń bolashaq strategiiasyna qatysty kózqarastary ártúrli bolyp tur. Al bul kelispeýshilik bank qyzmetine selkeý túsirip júrmeidi me? Bul búginderi atalǵan bank seriktesteri men tutynýshylaryn mazalaityn basty suraq. Bul rette Ǵalym Qusaiynov mynany aitady:
"Qazir kórip otyrǵanymyzdai, atalǵan jait bank qyzmetine áser etip jatqan joq, óitkeni bizde retteýshi orta bar, sondyqtan aktsionerlerdiń operatsiialyq qyzmetke aralasýy óte qiyn. Basqarma men direktorlar keńesiniń músheleri zań aldynda úlken jaýapkershilikke ie jáne olardyń bankke ziian keltirý nieti joq dep sanaimyn. Menshik ieleri strategiialyq máseleni sheship jatqanda, menedjement shtattyq rejimde jumysyn jalǵastyrýda ári joǵarydaǵy daý-damaidyń bank tutynýshylaryna esh teris áseri joq. Bir sózben aitqanda, buǵan deiin Eýraziialyq bank qalai jumys istese, qazir de solai óz qyzmetin jalǵastyrýda. Iaǵni, bul aradaǵy másele operatsiialyq emes, strategiialyq sipatqa ie. Aktsionerlerdiń jas býyny ary qarai qalai jyljimyz degen saýal tóńireginde túptep kelgende bir oi, bir pikirge toqailasady dep oilaimyn. Qazirgi ýaqyt – tranzittik kezeń. Basty eki aktsioner ómirden ótti, olardyń ornyn balalary basýda. Olardyń bank týraly ózindik oiy men jospary bar. Tranzittik kezeńde qojaiyndar bankti damytýdyń strategiiasy boiynsha ortaq bir sheshimge kelýi kerek nemese aktivti satyp, órkenietti jolmen eki jaqqa ketisýi tiis".
Sarapshynyń pikirinshe, atalǵan kúrmeýi qiyn jaǵdaida aktivti satý – utymdy joldyń biri. Bul arada másele ony kimge jáne qandai jaǵdaida satamyz degende taǵy kúrdelenýi múmkin. Al aktivtiń ózi óte tartymdy, óitkeni Eýraziialyq bank jái bank qana emes, iri saqtandyrý kompaniiasy jáne basqa da aktivterden turatyn tutas qarjylyq toptyń iadrosy bolyp tabylady. Bul Qazaqstan naryǵyna engisi keletin iri investor úshin dap-daiyn "klaster" dep aitsaq ta bolady. Onyń ústine saýda-sattyq úshin qazir eń qolaily kezeń. Naryq damyp tur, qarjy institýty joǵary baǵalanady.
"Qazir bankterdiń quny joǵary kez, óitkeni olar kóp aqsha tabady. Sondyqtan ony úshinshi tarapqa satýǵa bolatyn qolaily kezeń", - deidi maman.
Buǵan deiin BAQ betterinde Shyǵys Eýropadaǵy bankterdiń biri Qazaqstandaǵy iri banktiń birin satyp alýy múmkin ekendigi týraly aqparat paida bolǵan. Sarapshylar qaýymy bul rette ártúrli dolbar jasaýda. Al tanymal qarjyger Ǵalym Qusaiynov bul arada satyp alýshy – majarlyq OTP Bank-i (Vengriia), al satylymǵa qoiylǵany ForteBank bolýy múmkin ekenin aitady. Sondai-aq marqum Aleksandr Mashkevichtiń úlesi men Shodievtiń Ibragimovtermen kúresine qatysty 19 qyrkúiekke josparlanǵan Eýraziialyq qarjylyq kompaniiasy aktsionerleriniń jinalysyn sot boldyrmai tastaǵanyn da jazǵanbyz.
