ERG tobyna kiretin taǵy bir kompaniia Qazaqstan qor birjasyndaǵy óziniń qarapaiym aktsiialaryna delisting jasaitynyn málimdedi. Atap aitqanda, bul - Qaraǵandy oblysynda marganets kenishin igerýshi jáne marganets kontsentratyn óndirýshi "Marganets Jáirem" kompaniiasy, dep habarlaidy Dalanews.kz.
"Delisting erikti túrde jasalýda. Jalǵyz aktsioner bul protsedýrany 2025 jyldyń 2 maýsymynda maquldady. Ony ótkizý merzimderi áli belgilenbegen", dep jazady Forbes basylymy.
Aita ketsek, "Marganets Jáiremniń" qarapaiym aktsiialary KASE-de 2018 jyldyń jeltoqsanynda listingten ótip, olar balamaly alańnyń "Aktsiialar" sektoryndaǵy resmi tizimge engizildi. 2020 jyldyń qarashasynda kompaniia ózderi jariialaǵan aktsiialarynyń basym bóligin sol araǵa ornalastyrdy - 487 975 dana (500 myńnan). Bireýiniń quny 10 myń teńge bolyp belgilendi, jalpy somasy shamamen 4,9 mlrd teńgeni qurady. Aktsiialardy basym satyp alý quqyǵyna ie jalǵyz aktsioner satyp aldy, ol sol kezdegi "Qazmyryshqa" tiesili Jáirem taý-ken baiytý kombinaty boldy.
2021 jyldyń jeltoqsanynda "Marganets Jáiremniń" qojaiyny ózgerdi: Niderlandyda tirkelgen KCR International B. V. kompaniiasy, alaida túpki basqarýshysy - ERG. 2024 jyldyń qarashasynda ERG "Marganets Jáiremniń" tikelei bas kompaniiasyn Qci Metals And Mining B. V-men almastyrdy, ol da Amsterdamda "tirkelgen». 2025 jyldyń 1 sáýirindegi jaǵdai boiynsha, oǵan ornalastyrylǵan jáne jariialanǵan jai aktsiialardyń jalpy kóleminiń 100%-y tiesili (500 myń dana).
2025 jylǵy 1 sáýirdegi jaǵdai boiynsha, KASE derekterine sáikes, "Marganets Jáiremniń" menshikti kapitaly minýs 11,8 mlrd teńgeni qurady (2025 jylǵy 1 qańtardaǵy jaǵdai boiynsha, 893,4 mln teńge bolǵan), taza paida da minýs 940,4 mln teńge bolady, alaida 2025 jylǵy 1 qańtardaǵy jaǵdai boiynsha, shyǵyn eki eselendi: - 2,03 mlrd teńge.
Budan bir apta buryn ERG quramyna kiretin "Qazhrom" transulttyq kompaniiasy da KASE-degi óz aktsiialaryna delisting jasaityny belgili bolǵan. Kompaniia bul áreketin ótimdiliktiń tómendigine jáne baǵaly qaǵazdardy ornalastyrý boiynsha jańa josparlarynyń bolmaýymen bailanysty ekenin aitady.
"Qazhrom" TUK" AQ aktsiialary KASE qor birjasynyń resmi tizimine engizilgen, alaida usynystyń bolmaýyna bailanysty birjada aktsiialarǵa suranys bolmai jatyr. Metall naryǵyndaǵy baǵalardyń qubylmalylyǵyn qamtityn qazirgi ǵalamdyq naryqtaǵy jaǵdaidy jáne aktsiialardy jariia ornalastyrý josparynyń bolmaýy, iaǵni ótimdiliktiń tómen deńgeiin eskere otyryp, ERG "Qazhrom "TUK" AQ aktsionerleriniń jalpy jinalysyna qor birjasynda erikti delisting jasaý másele talqysyn usyný týraly strategiialyq sheshim qabyldady", - dep jaýap bergen ERG "Kýrsiv" basylymy joldaǵan saýalǵa.
Ótken aptanyń sońynda "Qazhrom" múddeli tulǵalardy 27 maýsymda kompaniia aktsionerleriniń kezekten tys jalpy jinalysy ótkiziletinin habardar etken bolatyn.
1 sáýirdegi jaǵdai boiynsha, "Qazhromnyń" qarapaiym aktsiialarynyń 99,99%-y Dýbaida tirkelgen KCR METALS FZCO-ǵa tiesili, túpkilikti egesi Liýksembýrgtegi bas kompaniia - Eurasian Resources Group S. A. r.l. "Qazhrom" hrom jáne marganets kenderin óndirýmen jáne satýmen, sondai-aq ferroqorytpalardy óndirýmen jáne satýmen ainalysady. Toptyń barlyq aktivteri Qazaqstanda ornalasqan. 2025 jyldyń I-toqsanynyń qorytyndysy boiynsha, "Qazhrom" 30,3 mlrd teńge taza paida tapty. Al 2024 jyldyń osyǵan uqsas kezeńindegi bul kórsetkish 61,4 mlrd teńgeni quraidy. Kompaniianyń kirisi 220,26 mlrd teńgege deiin ósti, onyń ishinde joǵary kómirtekti ferrohromdy satýdan 175,7 mlrd teńge (joǵary kómirtekti ferrohromdy satýdan 159,89 mlrd teńge) paida tústi, 2024 jyldyń I-toqsanynda bul kórsetkish 195,98 mlrd teńge bolǵan.
Eurasian Resources Group (ERG) úlesteri mynandai: marqum Álijan Ibragimovtyń áieli Muqadashan men uldary Dostan, Davron, Shýhrat jáne Fýrhatqa 20,7%, 2025 jyly 22 naýryzda qaitys bolǵan Aleksandr Mashkevichtiń muragerlerine 20,7%, Patoh Shodievke 18,6%, QR Úkimetine 40% tiesili.
ERG-ǵa "Qazhrom", "Qazaqstan aliýminiii", SSKÓB, Qazaqstandyq elektroliz zaýyty, "Eýroaziialyq energetikalyq korporatsiia", "Shubarkól kómir", "TransKom" kólik toby jánebasqa da kásiporyndar tiesili.
Aita ketsek, ERG-dyń moinynda 4 mlrd dollar qaryz bar, onyń ústine kompaniianyń sońǵy eki jylda shyǵyndary artýda. Shýhrat Ibragimov kompaniianyń baqylaý paketin ielený úshin óziniń marqum ákesi Álijan Ibragimovtyń seriktesterinen ERG-degi úlesterin satyp almaq týraly aqparat sheteldik BAQ-ta aqparat jariialanǵan edi.
