Atyraý qalasynda Embimunaigaz kompaniiasy bas direktorynyń kommertsiialyq máseleler jónindegi orynbasary, basqarma múshesi Ilias Quramysov mas kúiinde kólik basqarǵany úshin 15 táýlikke ákimshilik qamaqqa alynyp, 7 jylǵa júrgizýshi kýáliginen aiyryldy, dep habarlaidy Dalanews.kz.
Bul týraly Atyraý qalasynyń ákimshilik quqyq buzýshylyqtar jónindegi mamandandyrylǵan sotynyń 2025 jylǵy 15 jeltoqsandaǵy qaýlysynda kórsetilgen.
Sot materialdaryna sáikes, 2025 jylǵy 15 jeltoqsanda Ilias Quramysov Atyraý qalasyndaǵy Qulmanov kóshesinde «BMW X6» markaly kólikti alkogoldik masań kúide basqarǵan. Meditsinalyq kýálandyrý qorytyndysy onyń jeńil dárejede mas bolǵanyn rastaǵan.
Sot otyrysynda Quramysov óz kinásin moiyndamai, kólikti ózi basqarmaǵanyn, rólde «saý júrgizýshi» bolǵanyn, al ózi jolaýshy retinde otyrǵanyn aitqan. Onyń sózin advokaty da qoldap, politsiia qyzmetkerleriniń áreketterine kúmán keltirip, isti toqtatýdy suraǵan.
Alaida politsiia inspektory sotta Quramysovtyń kólikti mas kúiinde basqarǵanyn beinejazba dáleldeitinin, quqyq buzýshylyq jedel-profilaktikalyq is-shara barysynda anyqtalǵanyn málimdedi. Prokýror da Quramysovty ÁQBtK-niń 608-baby 1-bóligi boiynsha kináli dep tanýdy surady.
Sot sheshimi
Sot barlyq dáleldemelerdi zerttei kele, Quramysovtyń kinási tolyq dáleldendi degen qorytyndyǵa keldi. Nátijesinde ol:
• 15 táýlikke ákimshilik qamaqqa alyndy;
• 7 jyl merzimge kólik quralyn basqarý quqyǵynan aiyryldy.
Ákimshilik qamaq merzimi 2025 jylǵy 15 jeltoqsan kúni tańǵy 05:58-den bastap esepteledi. Júrgizýshi kýáligi sot qaýlysy tolyq oryndalǵanǵa deiin Atyraý qalasy politsiia basqarmasynda saqtalatyn boldy.
Sot qaýlysyna zańda belgilengen tártippen 10 táýlik ishinde apelliatsiialyq shaǵym túsirýge bolady.
