2024 jyly Qazaqstanda jol-kólik oqiǵalarynan zardap shekken balalar sany 133,7 paiyzǵa artty. Bul týraly senat depýtaty Nurlan Beknazarov málimdedi, dep habarlaidy Dalanews.kz.
Senatta ótken dóńgelek ústel otyrysynda sóz sóilegen Beknazarov jol qaýipsizdigi máselesi elimiz úshin ózekti kúiinde qalyp otyrǵanyn atap ótti. Onyń aitýynsha, qoldanystaǵy zańnama jol qozǵalysy salasyn jan-jaqty rettegenimen, eń basty basymdyq – jol qozǵalysyna qatysýshylardyń ómiri men densaýlyǵy bolýy tiis.
Senatordyń sózinshe, qazirgi jaǵdai jol qaýipsizdigin qamtamasyz etýdiń zamanaýi ádisterin ázirleýdi talap etedi. Bul baǵytta zańnamany jetildirý, jaýapkershilikti kúsheitý, memlekettik baqylaýdyń tiimdiligin arttyrý jáne júrgizýshilerdi daiarlaý sapasyn jaqsartý sekildi keshendi sharalar qolǵa alynýy qajet.
"Biraq Bas prokýratýranyń málimetinshe, 2024 jyly jol-kólik oqiǵalarynyń sany 98,9 paiyzǵa ósip, 31 597 jaǵdaiǵa jetken. Jaraqat alǵandar sany 109 paiyzǵa kóbeiip, 40 873 adamdy qurady. Al qaza tapqandardyń sany 1,4 paiyzǵa ósip, 2 579-ǵa jetti. Eń úlken alańdaýshylyq týdyryp otyrǵan másele – jol apatynan zardap shekken balalar sanynyń 133,7 paiyzǵa artýy (4 342-den 10 149-ǵa deiin). Sonymen qatar, olardyń arasyndaǵy ólim-jitim kórsetkishi de 3,5 paiyzǵa ósip, 317-den 328 balaǵa deiin kóbeidi", – dedi Beknazarov.
