2024 جىلى قازاقستاندا جول-كولىك وقيعالارىنان زارداپ شەككەن بالالار سانى 133،7 پايىزعا ارتتى. بۇل تۋرالى سەنات دەپۋتاتى نۇرلان بەكنازاروۆ مالىمدەدى، دەپ حابارلايدى Dalanews.kz.

سەناتتا وتكەن دوڭگەلەك ۇستەل وتىرىسىندا ءسوز سويلەگەن بەكنازاروۆ جول قاۋىپسىزدىگى ماسەلەسى ەلىمىز ءۇشىن وزەكتى كۇيىندە قالىپ وتىرعانىن اتاپ ءوتتى. ونىڭ ايتۋىنشا، قولدانىستاعى زاڭناما جول قوزعالىسى سالاسىن جان-جاقتى رەتتەگەنىمەن، ەڭ باستى باسىمدىق – جول قوزعالىسىنا قاتىسۋشىلاردىڭ ءومىرى مەن دەنساۋلىعى بولۋى ءتيىس.

سەناتوردىڭ سوزىنشە، قازىرگى جاعداي جول قاۋىپسىزدىگىن قامتاماسىز ەتۋدىڭ زاماناۋي ادىستەرىن ازىرلەۋدى تالاپ ەتەدى. بۇل باعىتتا زاڭنامانى جەتىلدىرۋ، جاۋاپكەرشىلىكتى كۇشەيتۋ، مەملەكەتتىك باقىلاۋدىڭ تيىمدىلىگىن ارتتىرۋ جانە جۇرگىزۋشىلەردى دايارلاۋ ساپاسىن جاقسارتۋ سەكىلدى كەشەندى شارالار قولعا الىنۋى قاجەت.

"ءبىراق باس پروكۋراتۋرانىڭ مالىمەتىنشە، 2024 جىلى جول-كولىك وقيعالارىنىڭ سانى 98،9 پايىزعا ءوسىپ، 31 597 جاعدايعا جەتكەن. جاراقات العاندار سانى 109 پايىزعا كوبەيىپ، 40 873 ادامدى قۇرادى. ال قازا تاپقانداردىڭ سانى 1،4 پايىزعا ءوسىپ، 2 579-عا جەتتى. ەڭ ۇلكەن الاڭداۋشىلىق تۋدىرىپ وتىرعان ماسەلە – جول اپاتىنان زارداپ شەككەن بالالار سانىنىڭ 133،7 پايىزعا ارتۋى (4 342-دەن 10 149-عا دەيىن). سونىمەن قاتار، ولاردىڭ اراسىنداعى ءولىم-جىتىم كورسەتكىشى دە 3،5 پايىزعا ءوسىپ، 317-دەن 328 بالاعا دەيىن كوبەيدى"، – دەدى بەكنازاروۆ.