Qazaqstandyq shahmatshy Bibisara Asaýbaeva áleýmettik jelide ózine baǵyttalǵan syndarǵa jaýap berip, sporttyq azamattyǵyn ne sebepti aýystyrǵanyn túsindirdi, dep habarlaidy dalanews.kz.
Sportshynyń aitýynsha, mansaby barysynda eń aýyr nárseniń biri – óz qandastarynyń qoldaý kórsetýi qiyn bolǵany.
«Muny moiyndaǵym kelmese de, ókinishke qarai, bul shyndyq. Búkil mansabymda qazaqtarǵa óz jetistigińe qýanyp, qoldaý kórsetý eń qiyn boldy», – dep jazdy shahmatshy.
«Men árdaiym Qazaqstan azamaty boldym»
Bibisara Asaýbaeva óziniń Resei atynan óner kórsetken kezeńine de toqtaldy. Onyń sózinshe, ol 12 jastan 15 jasqa deiin ǵana Resei quramasy sapynda jarystarǵa qatysqan jáne Qazaqstanǵa 2019 jyly, keiingi geosaiasi oqiǵalar bastalmai turyp oralǵan.
«Maǵan Resei úshin oinadyń dep jazady. Iá, men bala kezimde, 12 jastan 15 jasqa deiin Resei atynan óner kórsettim. Biraq Qazaqstanǵa 2019 jyly, bári bastalmai turyp oraldym», – dedi ol.
Shahmatshy sporttyq azamattyǵyn aýystyrý qarjylandyrý máselesine bailanysty bolmaǵanyn aitty.
«Sporttyq azamattyqty aýystyrýdyń sebebi qarjyda emes edi. Men árdaiym Qazaqstan azamaty boldym. Másele týǵan aǵamda boldy. Ol meniń damýyma kedergi keltirip, túrli qiyndyqtar týǵyzdy», – dep jazdy Asaýbaeva.
Aǵasy týraly ne aitty?
Bibisaranyń aitýynsha, týysy sol kezde Qazaqstan Respýblikasy Prezidenti ákimshiliginde qyzmet etken.
«Ol Prezident ákimshiliginde jumys istedi. Qyzmetinen ketkennen keiin ǵana biz Qazaqstanǵa qaita oraldyq jáne bul jaǵdai týraly ashyq aittyq. Eger adamdar osy máseleni azdap bolsa da zerttegende, ózderin sonshalyqty qatygez ári aqymaq ustamas edi», – dedi sportshy.
«Qazaq tilin úirenip júrmin»
Shahmatshy qazaq tilin meńgerý máselesine de toqtaldy. Onyń aitýynsha, jarystar men oqý-jattyǵý jiyndarynyń tyǵyz kestesine qaramastan, qazaq tilin úirenýge ýaqyt bólip júr.
«Meniń paraqshama jazylǵan adamdar kestemdi jaqsy biledi. 1 jeltoqsannan beri úide bar bolǵany 12-15 kún ǵana boldym. Soǵan qaramastan, oqý-jattyǵý jiyndary kezinde qazaq tilin oqyp júrdim. Biraq osynshama jekkórýshilik pen heitti kórgen saiyn oǵan degen ynta azaia beredi», – dep jazdy ol.
Ministrlikti synady
Bibisara Asaýbaeva jazbasynyń sońynda Týrizm jáne sport ministrliginiń ustanymyna qatysty da pikir bildirdi.
«Eger bizdiń ministrlik shahmat mańyzdy emes dep aitýdan ári meniń paraqshama bottardy jiberýden basqa eshteńe istei almasa, onda olardyń quny kók tiyn», – dep málimdedi shahmatshy.
Eske salaiyq, buǵan deiin Týrizm jáne sport ministrligi Bibisara Asaýbaevanyń jalaqysynyń qysqarýy shahmattyń basym sport túrleri qatarynan shyǵarylýyna bailanysty ekenin habarlaǵan bolatyn.
Aita keteiik, áńgime Baǵlan Mailybaev týraly degen aqparat tarady. Ol – Qazaqstan Prezidenti Ákimshiligi basshysynyń burynǵy orynbasary. Ol 2011-2017 jyldary osy qyzmetti atqaryp, ishki saiasat pen ideologiia máselelerine jetekshilik etti. Buǵan deiin Prezidenttiń baspasóz hatshysy, Mádeniet jáne aqparat vitse-ministri qyzmetterinde bolǵan.
2017 jyly Ulttyq qaýipsizdik komiteti ony memlekettik qupiialardy zańsyz jinaý, taratý jáne jariia etý kúdigimen ustady. Keiin sot Mailybaevty qyzmettik ókilettigin teris paidalaný jáne memlekettik qupiialarǵa qatysty zań buzýshylyqtar boiynsha kináli dep tanyp, 5 jylǵa bas bostandyǵynan aiyrdy. Onyń múlki tárkilenip, memlekettik qyzmette jumys isteý quqyǵynan ómir boiyna aiyryldy.
2020 jyly ol merziminen buryn bosatylǵany týraly aqparat tarady.
