Almaty oblysy Ile aýdanynyń turǵyny Ásem Abdýálieva Memleket basshysyna beineúndeý joldap, jubaiyna qatysty iske arasha túsýin surady. Onyń aitýynsha, daýdyń basynda burynǵy politsiia qyzmetkeri tur. Dál osy jait tergeýdiń “birjaqty” sipat alýyna sebep bolǵan. Úsh balanyń anasy oqiǵanyń burmalanǵanyn, mańyzdy aiǵaqtardyń eskerýsiz qalǵanyn jáne kúieýine negizsiz qysym jasalyp jatqanyn alǵa tartty. Oqiǵanyń mán-jaiyn bilý úshin Dalanews.kz redaktsiiasy jábirlenýshi tarappen tildesip, daýly istiń egjei-tegjeiin surap bildi.
Oqiǵa qalai bastalǵan?
Ásemniń sózinshe, oqiǵa 2025 jyly 13 tamyzda turǵyn úi aýlasynda bolǵan. Sol kúni jubaiy 11 jastaǵy uly men eki jasar qyzyn balabaqshadan alyp, úige qaityp kele jatqan. Úsheýi kólikten túsip, podezge qarai bettegen sátte, oń jaqtan joǵary jyldamdyqpen kelgen kólik olardy qaǵyp kete jazdaǵan.
“Júrgizýshi tejegishin áreń basyp úlgergen. Sol kezde kólik ainasy joldasymnyń qolyna tiip ketken. Osy sátte kúieýim oǵan eskertý jasaǵan”, - deidi Abdýálieva.
Alaida qarapaiym eskertýdiń sońy úlken daýǵa ulasqan.
Ásemniń aitýynsha, júrgizýshi agressiia tanytyp, kóliginen túsip, balalardyń jylap jatqanyna qaramastan janjal shyǵarǵan.
Joldasy kishkentai qyzyn kóterip, úige qarai ketpek bolǵanda, qarsy tarap ony iyǵynan tartyp, “kólikke otyr, sóileseiik” dep kúshtep toqtatqan. Keiin olar kórshi aýlanyń shetinde sózge kelip, jaǵdai ýshyǵyp ketken.
“Sol jerde álgi adam joldasymdy birneshe ret tepken. Sonyń saldarynan qolynyń saýsaǵy synǵan”, – deidi áiel.
Ásem ózi de arasha túsýge shyqqanyn aitady. Biraq qarsy tarap ony iterip, “Sen durys adamǵa tap bolǵan joqsyń, saǵan kórsetemin!” dep qorqytqan.
“Tipti, sol kezde ol áldekimge qońyraý shalyp, “meni uryp ketti” dep joldasyma jala japty”, – deidi Ásem.
Jábirlenýshi taraptyń aryzy qabyldanbaǵan
Oqiǵadan keiin otbasy politsiiaǵa birden habarlasa almaǵan. Sebebi olar úlken balasynyń kózin teksertý úshin meditsinalyq ortalyqqa asyqqan.
Sol aralyqta qarsy tarap birinshi bolyp politsiiaǵa aryz túsirgen. Keiin belgili bolǵandai, ol buryn Ile aýdandyq politsiiasynda ýchaskelik qyzmet atqarǵan.
Kelesi kúni Ásemniń jubaiy da aryz jazǵan. Alaida áieldiń aitýynsha, onyń óz aryzy múlde tirkelmegen.
“Meniń aryzymdy tirkemedi, talon da bermedi. Al joldasymnyń aryzy boiynsha eshqandai zańdy jaýap bolmady”, – deidi ol.
Tergeý amaldary qalai júrgizilgen?
Abdýálievanyń sózinshe, joldasy tergeýshilerden birneshe ret kamera jazbalary men kýágerlerden jaýap alýlaryn suraǵan. Biraq atalǵan derekter tekserilmegen.
“Bul kúndiz bolǵan jaǵdai. Kýágerler jetip artylady. Biraq eshkimnen eshteńe suramady, kamerany da qaramady”, – deidi Ásem.
Soǵan qaramastan, is boiynsha onyń jubaiyna qatysty bap aýyrlatylyp, Qylmystyq kodekstiń 107-baby 1-bóliginen 2-bóligine aýystyrylǵan.
Ásem Abdýálieva tergeý tek qarsy taraptyń shaǵymy negizinde júrgizilip jatqanyn alǵa tartty. Onyń sózinshe, osy ýaqyt ishinde tórtinshi tergeýshi aýysqan.
“Ár tergeýshi kelgen saiyn joldasymdy shaqyryp, qysym jasaidy. Kináńdi moiynda, keshirim sura, aqsha ber, aryzyn qaitaryp alsyn dep aitady”, – deidi ol.
Al qarsy tarap bolsa, odan da aýyr talaptar qoiǵan.
“Áke-shesheńmen, bala-shaǵańmen kelip, aiaǵyma jyǵylyp keshirim surańdar dedi. Odan bólek, advokattarǵa ketken shyǵyndy óteý úshin 1 million teńge talap etti”, – deidi Ásem.
Qysym men qorqytý
2026 jylǵy aqpan aiynda bolǵan jaǵdailar bul istegi qysymdy odan ári kúsheitken.
Ásemniń aitýynsha, tergeýshi joldasyn “qamap qoiamyn” dep qorqytqan. Joldasy “nege?” dep suraǵanda, ol “bárin keiin anyqtaimyz” dep jaýap bergen.
Al bettestirý kezinde qarsy tarap ashyq túrde: “Saǵan kórsetemin dep aittym ǵoi. Men aiyppul tólei salamyn, al sen túrmege otyrasyń!” degen.
Sonymen qatar joldasyna “kináni jartylai moiynda” degen qysym jasalǵan.
Prokýratýranyń jaýaby qandai?
Otbasy bul másele boiynsha Ile aýdandyq prokýratýrasyna da júgingen. Alaida olardyń aitýynsha, naqty nátije bolmaǵan.
“E-ótinish arqyly shaǵymdandyq. Biraq tek jalpylama jaýap aldyq. Másele sheshilgen joq”, – deidi Ásem.
Otbasynyń qazirgi jaǵdaiy
Aitýynsha, uzaqqa sozylǵan tergeý men qysym jubaiynyń psihologiialyq jaǵdaiyna da áser etken.
“Joldasym kúizeliske tústi. Uiqysy buzyldy, ómirge degen qyzyǵýshylyǵy joǵaldy. Keide “sharshadym, ómir súrgim kelmeidi” dep aitady”, – deidi ol.
Jubaiy – úsh balanyń ákesi. Sonymen qatar birinshi toptaǵy múgedek anasy men qart ákesine qarailasyp otyrǵan jalǵyz asyraýshy eken.
“Erteń qamap tastasa, anama topyraq sala almai qalamyn dep ýaiymdaidy”, – deidi Ásem.
Ádildik talap etemin
Osyǵan bailanysty Ásem Abdýalieva Memleket basshysy Qasym-Jomart Toqaevtan kómek surap otyr. Ol quzyrly organdarǵa isti jan-jaqty ári obektivti tekserýdi tapsyrýdy, tergeý barysynda zańdylyq pen beitaraptyqtyń saqtalýyn qamtamasyz etýdi talap etti.
“Zań bárine birdei bolýy kerek”, — dep túiindedi ol.
