Almaty oblysy Qarasai aýdany Kókózek aýylynda eks-politsei kóligimen basyp ketken balanyń jaǵdaiy óte aýyr, dep habarlaidy Dalanews.kz.
Bul týraly Sputnik Qazaqstan tilshisine balanyń ákesi aitty.
Tapa-tal túste kóliktiń astynda qalǵan 7 jastaǵy Janarys Tólenniń jaǵdaiy óte aýyr. Ony 42 jastaǵy burynǵy politsiia qyzmetkeri kóligimen basyp ótip ketken. Balany qaqqan boida ol oqiǵa ornynan izin sýytqan.
"Balamnyń jaǵdaiy óte aýyr. Jansaqtaý bóliminde jatyr. Eki ret ota jasaldy, sodan ońalmai tur. Baýyry ezilip, ókpesi eki jerden tesilgen", - deidi balanyń ákesi Erkin Qalyqbaev.
Kúdikti sol Kókózek aýylynda ýchaskelik politsiia inspektory bolyp istegen. Keiingi kezderi mas kúide júretin. Oqiǵa bolǵan kúni de mas bolǵan, deidi balanyń ákesi.
"Qaskeleńdik dárigerler oblystyq balalar aýrýhanasyna aýystyramyz dep sol jaqqa suranys jiberip qoidy, biraq oblystyq balalar aýrýhanasy áli jaýap qatpady. Balamnyń ókpesine eki jerine zont qoiǵan. Aiaq-qoly synbaǵan siiaqty, biraq qozǵala almaidy. Balam kózin ashady, biraq til joq", - deidi Erkin Qalyqbaev.
Janarys otbasyndaǵy tórt balanyń úshinshisi. Ata-anasy jeke kásippen ainalysady. Talapty bala taekvandomen ainalysqan. Tipti talai ret jeńisti qanjyǵasyna bailaǵan.
Almaty oblystyq politsiia departamenti ýchaskelik politsei oqiǵa bolardan buryn jumystan shyǵarylǵanyn aitady.
Jedel-izdestirý is sharalary barysynda Lexus RX 300 avtokóliginiń 42 jastaǵy júrgizýshisi ustaldy. Kúdikti ýaqytsha ustaý izoliatoryna qamaldy.
"Atalǵan azamat politsiia qyzmetkeri emes, ol jol apatynan buryn teris sebeptermen jumystan shyǵarylǵan. Bul fakt boiynsha tergeý júrgizilip jatyr", - deidi vedomstvo.
Eske salaiyq, buǵan deiin Almaty oblysynda ishimdikke sylqiia toiyp alǵan politsei qyzmetkeri kóligimen alty jasar balany basyp ketip, oqiǵa ornynan izin sýytqany týraly jazǵan edik.
Oqiǵa 4 shilde kúni keshki saǵat toǵyzǵa qarai Almaty oblysyna qarasty Kókózek aýylynda bolǵan. Kýágerlerdiń aitýynsha, rólde ýchaskelik politsiia inspektory otyrǵan. Ol kóligin artqa qarai júrgizip kele jatyp, kóshede oinap júrgen balany qaǵyp ketken.
Áleýmettik jelige taraǵan videoda balany kólikpen basyp ótken júrgizýshiniń tipti aialdap, jaǵdaidy anyqtaýǵa niet tanytpaǵany anyq kórinedi. Ol sol boida gazdy basyp, izin jasyrǵan.
Almaty oblysynyń politsiia departamenti oqiǵaǵa qatysty resmi túsinikteme berip, kúdiktiniń kim ekenin áli naqtylamady. Biraq oblystyq politsiianyń barlyq jeke quramy kúdiktini izdeýge jumyldyrylǵanyn habarlady.
Qazir oqiǵa ornynan qashyp ketken inspektorǵa qatysty jedel izdestirý sharalary bastaldy. Ázirge zardap shekken balanyń jaǵdaiy týraly aqparat joq. Oqiǵanyń egjei-tegjeiin quzyrly organdar tekserip jatyr.
