Qazaqstan Respýblikasy Densaýlyq saqtaý ministrligi Ulttyq shuǵyl meditsinany úilestirý ortalyǵymen birlesip, Ulttyq ulannyń burynǵy áskeri qyzmetshisi Muhtar Erbaiannyń qaitys bolýyna bailanysty onyń otbasy men jaqyndaryna qaiǵyra kóńil aitty, dep habarlaidy dalanews.kz.
DSM dárigerler úsh jylǵa jýyq ýaqyt boiy naýqastyń ómirin saqtap qalý úshin kúreskenin, alaida alǵan asa aýyr jaraqattarynyń saldarynan bas miynda qaitymsyz ózgerister bolyp, naýqastyń ómirin saqtap qalý múmkin bolmaǵanyn atap ótti.
Naýqas Muhtar Erbaian Hamituly 2023 jyldan beri merzimdi áskeri qyzmetin óteý kezinde alǵan aýyr bas-mi jaraqatynyń saldarynan asa aýyr jaǵdaida boldy. Uzaq ýaqyt boiy turaqty vegetativtik kúi saqtaldy. Respiratorlyq qoldaýdy qosa alǵanda, qarqyndy terapiia júrgizilgenine qaramastan, ómirlik mańyzdy kórsetkishterdiń birtindep nasharlaýy baiqaldy. Atap aitqanda, qandaǵy ottegi satýratsiiasynyń tómendeýi, júrek yrǵaǵynyń buzylýy jáne gemodinamikanyń turaqsyzdyǵy tirkeldi. Naýqastyń jaǵdaiy asa aýyr kúiinde qaldy, - deidi vedomstvo ókilderi.
Meditsina mamandary tarapynan barlyq qajetti reanimatsiialyq jáne emdik is-sharalar kesheni tolyq kólemde júrgizilgen.
Ishki ister ministrligi men Densaýlyq saqtaý ministrliginiń birlesken uiymdastyrýymen naýqas em alý úshin Túrkiia Respýblikasyna jiberilip, onda bastapqy diagnoz rastaldy. 2026 jyldyń maýsym aiynda negizgi aýyr syrqattyń aiasynda infektsiialyq asqynýlar, sepsis jáne kóp aǵzalyq jetkiliksizdik sindromy damydy. 2026 jylǵy 23 maýsymda saǵat 21:40-ta naýqastyń biologiialyq ólimi tirkeldi. Ólimniń tikelei sebebi aýyr bas-mi jaraqatynyń saldary men oǵan qosylǵan asqynýlar aiasynda damyǵan kóp aǵzalyq jetkiliksizdik sindromy boldy, - delingen habarlamada.
Erbaian eń zamanaýi meditsinalyq jabdyqtarmen jabdyqtalǵan palatada em qabyldaǵan. Oǵan zamanaýi dárilik terapiia júrgizilip, erekshe kútim jaǵdailary qamtamasyz etilgen.
Meditsinalyq personal emdeý men kútimniń barlyq qajetti kólemin qamtamasyz etti. Sondai-aq naýqastyń týystarynyń jan saqtaý bólimshesine kirýine múmkindik berilip, sapaly meditsinalyq kómek kórsetý úshin barlyq qajetti jaǵdai jasaldy, - deidi DSM ókilderi.
Eske salsaq, Erbaian Muhtar áskerde júrip aýyr jaraqat alǵannan keiin uzaq ýaqyt boiy ómiri úshin kúresti. Onyń densaýlyq jaǵdaiy qoǵamda úlken rezonans týdyryp, qazaqstandyqtar áskeri bólimde bolǵan oqiǵanyń aqiqatyn ashýdy, kinálilerdi jaýapqa tartýdy talap etken edi.
