Básekege qabiletti sailaý júiesi bar elde proportsionaldy, majoritarlyq nemese aralas júielerdiń artyqshylyqtary men kemshilikteri týraly másele kóterip, áńgime aitýǵa bolady, negizi.
Al Tuńǵysh prezidentimizdiń eldegi júieni proportsionaldy dep ataǵany endi, tipti shyndyqqa sai kelmeidi.
Olardy feik partiialar, zombi depýtattar dese bolady, biraq olar óz baǵdarlamasynyń, kóshbasshylary nemese partiialarynyń kúshimen joiqyn dodada jeńiske jetip, elektoraldy mandat jinaityn klassikalyq saiasi partiialar qataryna jatpaidy.
Bizdiń bilikke parlamenttik sailaýǵa qaisy yńǵaily: proportsionaldyq pa, álde majoritarlyq júie me dep oilanyp, sharshaýdyń túkke keregi joq.
Bul arada básekelestik te, ashyqtyq ta, sailaýshylary da joq áldeqashan «ólip» qalǵan sailaý júiesiniń ózin ózgertý kerek.
Basqa elderdiń tájiribesi Parlament sailaýynda proportsionaldyq ta, majoritarlyq ta, aralas júieler de bola beretinin kórsetedi. Biraq istiń mánisi onda emes.
Barlyq jerdiń kem-ketigi men óz artyqshylyǵy bolady. Biraq olardy biriktiretin jalǵyz nárse bar. Ol - joǵary saiasi básekelestik, feik partiialardyń, zombi depýtattardyń bolmaýy.
Árine, ol arada da saiasi popýlizmge keńinen jol beriledi, biraq parlamenttiń quramy qoǵamnyń kóńil-kúiiniń ainasy ispetti, bárin kórsetip turýy kerek.
Bizdegidei atqarýshy biliktiń qas-qabaǵyn baǵyp, solardyń aitqanyna quldyq urmaidy. Sondyqtan bilikti bólshektemese bolmaidy.
Áitpese, týra bizdegidei bolady: Parlament sailanbaidy, tek «portsionaldy-minoritarlyq júie negizinde qurylady. Osy júie saqtalyp qalsa, onda kez-kelgen merziminen buryn parlamenttik sailaýdan jaqsylyq, bir jańashyldyq kútip keregi joq.
Ol bir ornynda kegejektep turýdy bildiredi. Biraq bizdikiler alys qashyqtyqqa júgirý sekildi maqtanýyn asyrap jarnamalaidy deisiz kelip...
