AQSh prezidenti Donald Tramp Qytai taýarlaryna joǵary baj salyǵyn engizýdi taǵy 90 kúnge keiinge qaldyratyn Jarlyqqa qol qoidy, dep habarlaidy Dalanews.kz.
CNBC agenttiginiń málimetinshe, Donald Tramp Qytai taýarlaryna joǵary baj salyǵyn engizýdi taǵy 90 kúnge keiinge qaldyrǵan Jarlyqqa qol qoidy. AQSh prezidenti bul jarlyqqa tún ortasyna birneshe saǵat qalǵanda qol qoiǵan, óitkeni onsyz aldynda Qytaiǵa qatysty ózi jariialaǵan bajdar óz kúshine ener edi.
CNBC qujattyń kúshine ený merzimin uzartý ótken aida bolǵan AQSh pen Qytai arasyndaǵy saýda kelissózderiniń nátijesi ekenin atap ótti.
Shilde aiynda Bloomberg QHR Kommertsiia ministriniń orynbasary Li Chenganǵa silteme jasai otyryp, qytai men amerika tarapy bir-biriniń taýarlaryna salynǵan joǵary baj salyǵyn qoldanysqa engizý merzimin uzartý ideiasyn qoldaǵanyn habarlaǵan.
AQSh Qarjy ministri Skott Bessent de buǵan deiin qujatty kúshine engizý merzimin 90 kúnge uzartý qarastyrylyp otyrǵan nusqalardyń biri ekenin málimdegen. Vashington men Beijiń delegatsiialary arasyndaǵy saýda kelissózderiniń úshinshi raýndy 28-29 shildede Stokgolmde ótti.
Aldyńǵy raýndtar 10-11 mamyrda Shveitsariiada jáne 9 maýsymda Ulybritaniiada ótti. Buǵan deiin Tramp Qytaimen arada saýda kelisimine qol qoiǵanyn aitqan bolatyn.
Keiinirek AQSh saýda ministri Govard Latnik Tramp atap ótken qol qoiylǵan qujat AQSh pen Qytaidyń Jeneva men Londondaǵy saýda kelissózderinde qol jetkizgen bajdar boiynsha bekitilgen kelisimderi ekenin, onyń eki el arasyndaǵy jan-jaqty saýda kelisimine jatpaitynyn jetkizgen.
Aita ketsek, AQSh prezidenti Donald Tramp ózara baj dep atalatyn jarlyǵy 7 tamyzdyń tún ortasynda (Máskeý ýaqytymen 07:00) óz kúshine engenin rastady. Iá,1 tamyzda Tramp 60-tan astam memleket pen Eýropalyq odaqqa qatysty da 15%-dan 41%-ǵa deiingi aralyqty qamtityn baj salyǵyn engizý týraly jarlyqqa qol qoidy. Eń joǵary tarifter Siriia (41%), Laos (40%), Mianma (40%), Shveitsariia (39%), Irak (35%) jáne Serbiia (35%) siiaqty memleketterge baǵyttalǵan. Qazaqstanǵa 25 paiyzdyq baj salyǵy engiziletini de eskertilgen. Bul tizimde Resei joq. Sebebi sanktsiialarǵa bailanysty arada alys-beris áldeqashan toqtaǵan. Degenmen Tramp 8 tamyzdan keiin Reseige munai salasyn qamtityn qatań sanktsiia engizetinin jariialap, ýltimatým qoiǵan bolatyn. Bul rette belgilisi, 6 tamyzda AQSh prezidentiniń Resei munaiyn tutynyp qana qoimai, ony óńdep Batys elderine satý arqyly ekonomikasyn kóterip otyrǵan Úndistanǵa baj salyǵyn salatyn jarlyqqa qol qoiǵany. Ol tamyzdyń sońynda kúshine enedi dep kútiledi. Aq úi Qytaiǵa da osyndai shara qoldanylatynyn jariialap úlgerdi. Osy máselelerdi talqylaý úshin AQSh pen RF prezidentteri kezdespek niette. Bul týraly Kremlde Vladimir Pýtin AQSh prezidentiniń arnaiy ókili Stiven Ýitkoffty qabyldaǵannan keiin aityldy. Qos kóshbasshynyń kezdesýi 11 tamyzǵa belgilengeni belgili boldy.
