Májilis depýtaty Dáýlet Turlyhanovtyń 54 jastaǵy aǵasy Marat Bolatuly Turlyhanov resmi túrde bankrot dep jariialandy. Bul sheshim 2024 jyldyń 12 jeltoqsanynda qarjy basqarýshysynyń esebine sáikes qabyldanǵan, dep habarlaidy Dalanews.kz.
Nege.kz málimetinshe, Marat Turlyhanovtyń qarjylyq qiyndyqtary «Tas Mai Risorsiz» kompaniiasymen tikelei bailanysty. 2006 jyly bul kompaniia munai men gazdy barlaý jáne óndirý boiynsha kelisimshart alǵan. Jobany iske asyrý úshin jáne qol qoiylatyn bonýsty tóleý maqsatynda kompaniia «Kazkommertsbank» arqyly 42,3 million AQSh dollaryna deiingi limitpen nesie jelisin ashqan. Bul qaryz birneshe bailanysty kompaniialar men jeke tulǵalardyń atyna rásimdelgen, onyń ishinde Marat Turlyhanov pen S.K. Kósherbaeva bar.
2015 jyly atalǵan boryshqa qatysty talap etý quqyǵy BTA Bankine, al 2017 jyly «Problemalyq nesieler qory» aktsionerlik qoǵamyna ótken. Sol kezeńde «Tas Mai Risorsiz» kompaniiasynyń jalpy bereshegi 12,2 milliard teńgeden asqan. Bul shemaǵa qatysqan keibir kompaniialar keiin bankrot boldy – olardyń arasynda «Dom Kazahstan», «ARINAS», «Ikan Global» bar. 2023 jyly «Tas Mai Risorsiz» te bankrot dep tanyldy.
Keiin zańdy tulǵalar bankrot bolǵan soń, qaryz mindettemeleri jeke tulǵalarǵa júkteldi. Osyǵan bailanysty Marat Turlyhanov ózin bankrot dep taný týraly sotqa júgindi. Ol bereshegin óteýge shamasy jetpeitinin alǵa tartty. Is materialynda onyń 13,5 milliard teńgeden astam bereshegi bary, al nesie berýshi retinde «Problemalyq nesieler qory» kórsetilgen.
Marat Turlyhanovtyń aitýynsha, onyń atyna tirkelgen eshqandai qozǵalatyn nemese qozǵalmaityn múlik joq, jumys istemeidi, al jalǵyz tabys kózi – 370 myń teńge kólemindegi eńbek sińirgen jattyqtyrýshy retinde alatyn zeinetaqysy. Sol qarjyǵa úsh adamdy asyrap otyr.
Ol bereshekti sotqa deiin retteýge tyrysyp, kreditorǵa hat joldaǵan, biraq osy kezde jeke sot oryndaýshy atqarýshylyq is júrgizýdi bastap ketken.
Sot materialynda Turlyhanovtyń «Daýlet» kásibi áielder klýbyndaǵy jarǵylyq kapitalda 10 000 teńge kóleminde úlesi bar ekeni jazylǵan. Biraq onyń sózinshe, bul úlesten eshqandai paida túspegen. Keiin bul úles te satylǵan.
Sot sheshimimen Marat Turlyhanov resmi túrde bankrot dep tanylyp, oǵan jańa qarjylyq mindettemeler alýǵa jáne elden shyǵýǵa tyiym salyndy. Qarjy basqarýshysynyń qorytyndy esebine sáikes, Turlyhanovtyń atyna tirkelgen múlik, kólik nemese jer telimderi joq, sondyqtan bereshekti óteý múmkin emes. Osyǵan bailanysty sot kreditorlarǵa qaryzdy esepten shyǵarýdy mindettedi.
