ءماجىلىس دەپۋتاتى داۋلەت تۇرلىحانوۆتىڭ 54 جاستاعى اعاسى مارات بولات ۇلى تۇرلىحانوۆ رەسمي تۇردە بانكروت دەپ جاريالاندى. بۇل شەشىم 2024 جىلدىڭ 12 جەلتوقسانىندا قارجى باسقارۋشىسىنىڭ ەسەبىنە سايكەس قابىلدانعان، دەپ حابارلايدى Dalanews.kz.
Nege.kz مالىمەتىنشە، مارات تۇرلىحانوۆتىڭ قارجىلىق قيىندىقتارى «تاس ماي ريسورسيز» كومپانياسىمەن تىكەلەي بايلانىستى. 2006 جىلى بۇل كومپانيا مۇناي مەن گازدى بارلاۋ جانە ءوندىرۋ بويىنشا كەلىسىمشارت العان. جوبانى ىسكە اسىرۋ ءۇشىن جانە قول قويىلاتىن بونۋستى تولەۋ ماقساتىندا كومپانيا «كازكوممەرسبانك» ارقىلى 42،3 ميلليون اقش دوللارىنا دەيىنگى ليميتپەن نەسيە جەلىسىن اشقان. بۇل قارىز بىرنەشە بايلانىستى كومپانيالار مەن جەكە تۇلعالاردىڭ اتىنا راسىمدەلگەن، ونىڭ ىشىندە مارات تۇرلىحانوۆ پەن س.ك. كوشەربايەۆا بار.
2015 جىلى اتالعان بورىشقا قاتىستى تالاپ ەتۋ قۇقىعى بتا بانكىنە، ال 2017 جىلى «پروبلەمالىق نەسيەلەر قورى» اكسيونەرلىك قوعامىنا وتكەن. سول كەزەڭدە «تاس ماي ريسورسيز» كومپانياسىنىڭ جالپى بەرەشەگى 12،2 ميلليارد تەڭگەدەن اسقان. بۇل سحەماعا قاتىسقان كەيبىر كومپانيالار كەيىن بانكروت بولدى – ولاردىڭ اراسىندا «دوم كازاحستان»، «ARINAS»، «Ikan Global» بار. 2023 جىلى «تاس ماي ريسورسيز» تە بانكروت دەپ تانىلدى.
كەيىن زاڭدى تۇلعالار بانكروت بولعان سوڭ، قارىز مىندەتتەمەلەرى جەكە تۇلعالارعا جۇكتەلدى. وسىعان بايلانىستى مارات تۇرلىحانوۆ ءوزىن بانكروت دەپ تانۋ تۋرالى سوتقا جۇگىندى. ول بەرەشەگىن وتەۋگە شاماسى جەتپەيتىنىن العا تارتتى. ءىس ماتەريالىندا ونىڭ 13،5 ميلليارد تەڭگەدەن استام بەرەشەگى بارى، ال نەسيە بەرۋشى رەتىندە «پروبلەمالىق نەسيەلەر قورى» كورسەتىلگەن.
مارات تۇرلىحانوۆتىڭ ايتۋىنشا، ونىڭ اتىنا تىركەلگەن ەشقانداي قوزعالاتىن نەمەسە قوزعالمايتىن مۇلىك جوق، جۇمىس ىستەمەيدى، ال جالعىز تابىس كوزى – 370 مىڭ تەڭگە كولەمىندەگى ەڭبەك سىڭىرگەن جاتتىقتىرۋشى رەتىندە الاتىن زەينەتاقىسى. سول قارجىعا ءۇش ادامدى اسىراپ وتىر.
ول بەرەشەكتى سوتقا دەيىن رەتتەۋگە تىرىسىپ، كرەديتورعا حات جولداعان، ءبىراق وسى كەزدە جەكە سوت ورىنداۋشى اتقارۋشىلىق ءىس جۇرگىزۋدى باستاپ كەتكەن.
سوت ماتەريالىندا تۇرلىحانوۆتىڭ «داۋلەت» كاسىبي ايەلدەر كلۋبىنداعى جارعىلىق كاپيتالدا 10 000 تەڭگە كولەمىندە ۇلەسى بار ەكەنى جازىلعان. ءبىراق ونىڭ سوزىنشە، بۇل ۇلەستەن ەشقانداي پايدا تۇسپەگەن. كەيىن بۇل ۇلەس تە ساتىلعان.
سوت شەشىمىمەن مارات تۇرلىحانوۆ رەسمي تۇردە بانكروت دەپ تانىلىپ، وعان جاڭا قارجىلىق مىندەتتەمەلەر الۋعا جانە ەلدەن شىعۋعا تىيىم سالىندى. قارجى باسقارۋشىسىنىڭ قورىتىندى ەسەبىنە سايكەس، تۇرلىحانوۆتىڭ اتىنا تىركەلگەن مۇلىك، كولىك نەمەسە جەر تەلىمدەرى جوق، سوندىقتان بەرەشەكتى وتەۋ مۇمكىن ەمەس. وسىعان بايلانىستى سوت كرەديتورلارعا قارىزدى ەسەپتەن شىعارۋدى مىندەتتەدى.
