Shymkent qalasy ákiminiń orynbasary Rýslan Berdenovke jasalǵan shabýyl týraly májilis depýtaty Edil Jańbyrshin pikir bildirdi, dep habarlaidy Dalanews.kz.
Onyń aitýynsha, bul qylmysty «bilikke jasalǵan qasaqana shabýyl» dep baǵalaýǵa bolady.
«Menińshe, bul — memleketke tastalǵan ashyq syn. Eger bul shynymen tapsyryspen jasalǵan qylmys ekeni rastalsa, onda bul — bilikke túkirgenmen birdei, bul — bilikke ashyq qarsy shyǵý. Sebebi men Berdenovty adal, tártipti adam retinde bilemin. Onymen birge jumys istedik, sóilesip te júrdik. Osydan 3-4 kún buryn ǵana belgili bir másele boiynsha pikirleskenbiz. Buǵan deiin de sóilesip turǵanbyz. Ol qalada tártip ornatqysy kelgen edi. Bireýlerge bul unamai qaldy dep oilaimyn», – dedi Jańbyrshin májilis kýlýarynda.
Ol sonymen qatar bul is boiynsha sot protsesi ashyq ótýi kerek ekenin aitty.
«Menińshe, eń aldymen tapsyrys berýshini tabý kerek. Sot ashyq túrde ótýi tiis dep oilaimyn. Osyndai jaǵdailar qaitalanbas úshin, barlyǵyna sabaq bolýy úshin», – dedi depýtat.
Jańbyrshin boljam jasaý men túrli nusqalar aitý tergeý jumystaryna kedergi keltirip, japa shekken tarapqa ziian keltirýi múmkin ekenin de atap ótti. Jýrnalister depýtattan osyndai jaǵdaidan keiin jumys isteýge qoryqpaisyz ba dep surady. Májilismen bul suraqqa joq dep jaýap berdi.
Eske salaiyq, 21 sáýirde Shymkent ákiminiń orynbasary Rýslan Berdenovke qastandyq jasaldy.
Berdenov ańshy myltyǵynan atylǵan oqtan jaraqat alyp, jedel túrde aýrýhanaǵa jetkizilgen.
Oqiǵa kýágerleriniń jáne quqyq qorǵaý organdarynyń bergen aldyn ala málimetinshe, qala ákimdigine qarasty jaýapkershiligi shekteýli seriktestiktiń qyzmetkeri Berdenovke ańshy myltyǵymen oq atqan. Politsiia kúdiktini oqiǵa ornynda dereý ustaǵan.
Qazir qala ákiminiń orynbasary Rýslan Berdenov aýrýhanada jatyr, onyń jaǵdaiy týraly naqty málimet áli berilgen joq.
Quqyq qorǵaý organdary oqiǵa boiynsha qylmystyq is qozǵap, tergeý amaldaryn bastap ketti. Qazirgi ýaqytta atalǵan jaitqa bailanysty Shymkent politsiia departamenti, Ishki ister ministrligi men «Respublica» partiiasy resmi pikir ázirlep jatyr. Aita keteiik, Rýslan Berdenov osy partiianyń múshesi.
