شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان شابۋىل تۋرالى ءماجىلىس دەپۋتاتى ەدىل جاڭبىرشين پىكىر ءبىلدىردى، دەپ حابارلايدى Dalanews.kz.
ونىڭ ايتۋىنشا، بۇل قىلمىستى «بيلىككە جاسالعان قاساقانا شابۋىل» دەپ باعالاۋعا بولادى.
«مەنىڭشە، بۇل — مەملەكەتكە تاستالعان اشىق سىن. ەگەر بۇل شىنىمەن تاپسىرىسپەن جاسالعان قىلمىس ەكەنى راستالسا، وندا بۇل — بيلىككە تۇكىرگەنمەن بىردەي، بۇل — بيلىككە اشىق قارسى شىعۋ. سەبەبى مەن بەردەنوۆتى ادال، ءتارتىپتى ادام رەتىندە بىلەمىن. ونىمەن بىرگە جۇمىس ىستەدىك، سويلەسىپ تە جۇردىك. وسىدان 3-4 كۇن بۇرىن عانا بەلگىلى ءبىر ماسەلە بويىنشا پىكىرلەسكەنبىز. بۇعان دەيىن دە سويلەسىپ تۇرعانبىز. ول قالادا ءتارتىپ ورناتقىسى كەلگەن ەدى. بىرەۋلەرگە بۇل ۇناماي قالدى دەپ ويلايمىن»، – دەدى جاڭبىرشين ءماجىلىس كۋلۋارىندا.
ول سونىمەن قاتار بۇل ءىس بويىنشا سوت پروسەسى اشىق ءوتۋى كەرەك ەكەنىن ايتتى.
«مەنىڭشە، ەڭ الدىمەن تاپسىرىس بەرۋشىنى تابۋ كەرەك. سوت اشىق تۇردە ءوتۋى ءتيىس دەپ ويلايمىن. وسىنداي جاعدايلار قايتالانباس ءۇشىن، بارلىعىنا ساباق بولۋى ءۇشىن»، – دەدى دەپۋتات.
جاڭبىرشين بولجام جاساۋ مەن ءتۇرلى نۇسقالار ايتۋ تەرگەۋ جۇمىستارىنا كەدەرگى كەلتىرىپ، جاپا شەككەن تاراپقا زيان كەلتىرۋى مۇمكىن ەكەنىن دە اتاپ ءوتتى. جۋرناليستەر دەپۋتاتتان وسىنداي جاعدايدان كەيىن جۇمىس ىستەۋگە قورىقپايسىز با دەپ سۇرادى. ماجىلىسمەن بۇل سۇراققا جوق دەپ جاۋاپ بەردى.
ەسكە سالايىق، 21 ساۋىردە شىمكەنت اكىمىنىڭ ورىنباسارى رۋسلان بەردەنوۆكە قاستاندىق جاسالدى.
بەردەنوۆ اڭشى مىلتىعىنان اتىلعان وقتان جاراقات الىپ، جەدەل تۇردە اۋرۋحاناعا جەتكىزىلگەن.
وقيعا كۋاگەرلەرىنىڭ جانە قۇقىق قورعاۋ ورگاندارىنىڭ بەرگەن الدىن الا مالىمەتىنشە، قالا اكىمدىگىنە قاراستى جاۋاپكەرشىلىگى شەكتەۋلى سەرىكتەستىكتىڭ قىزمەتكەرى بەردەنوۆكە اڭشى مىلتىعىمەن وق اتقان. پوليسيا كۇدىكتىنى وقيعا ورنىندا دەرەۋ ۇستاعان.
ءقازىر قالا اكىمىنىڭ ورىنباسارى رۋسلان بەردەنوۆ اۋرۋحانادا جاتىر، ونىڭ جاعدايى تۋرالى ناقتى مالىمەت ءالى بەرىلگەن جوق.
قۇقىق قورعاۋ ورگاندارى وقيعا بويىنشا قىلمىستىق ءىس قوزعاپ، تەرگەۋ امالدارىن باستاپ كەتتى. قازىرگى ۋاقىتتا اتالعان جايتقا بايلانىستى شىمكەنت پوليسيا دەپارتامەنتى، ىشكى ىستەر مينيسترلىگى مەن «Respublica» پارتياسى رەسمي پىكىر ازىرلەپ جاتىر. ايتا كەتەيىك، رۋسلان بەردەنوۆ وسى پارتيانىڭ مۇشەسى.
