Májilis depýtaty Tańsáýle Serikov zeinet jasyndaǵy tehnikalyq kásip ielerine, atap aitqanda aýla sypyrýshysy, eden jýýshy, kiim qabyldaýshy syndy mamandarǵa da qurmetti ataqtar taǵaiyndap, olardy tósbelgilermen marapattaýdy usyndy, dep habarlaidy Dalanews.kz.
Ol óziniń depýtattyq saýaly eńbegi kóbine durys baǵalana bermeitin qarapaiym jumysshylarǵa qatysty ekenin atap ótti.
"Jumysshy mártebesin kóterý týraly aitqanda, munymen biz neni qamtimyz? Bul mekemeniń bedelin kóterý ǵana emes, sonymen qatar osy mekemede jumys isteitin qyzmetkerdiń mártebesin kóterý týraly da bolýy kerek. Qoǵamnyń tynys-tirshiligin qamtamasyz etetin, kózge kórine bermeitin, biraq asa mańyzdy jumysty oryndaityn mamandardyń: aýla tazalaýshylardyń, tehnikalyq qyzmetkerlerdiń, garderobshylardyń, kúzetshilerdiń, vahterlerdiń, eden jýýshylardyń jáne basqa da qosalqy kásip ókilderiniń mártebesi men eńbek jaǵdailary máselesi erekshe ózekti", - dedi depýtat.
Ol kóbinese bizderdiń basshylyq jáne negizgi mamandarǵa nazar aýdaratynymyzdy atap ótti. Biraq áldebireýdiń ákesi nemese aǵasy bolyp keletin esik aýzyndaǵy kúzetshi nemese áldebireýdiń anasy nemese ápkesi bolyp tabylatyn eden jýýshyny nazardan tys qaldyryp jatamyz.
"Iá, olardyń jumysy keremet bedelge ie emes shyǵar, biraq biz bul adamdardyń adami, azamattyq jáne áleýmettik mártebesin qurmetteýge jáne ony kótermeleýge mindettimiz. Olardyń da balalary bar. Olar: "Meniń anam eden jýýshy, ákem qaraýyl» dep maqtanyshpen aita alady ma? Biz olardyń osylai maqtanatyndai jaǵdai jasaýymyz kerek. Búgingi tańda bul jumysshylardyń jalaqysy ortasha respýblikalyq deńgeiden edáýir tómen. Aýyr fizikalyq jumys ekendigine qaramastan, olar kóbinese áleýmettik qorǵaý, túrli jeńildikter men kásibi qoldaýdan da tys qalyp jatady", - dedi Tańsáýle Serikov.
Depýtat eger osy adamdar kem degende bir kún jumysqa shyqpasa, kósheler qoqysqa tolyp, keńseler shańǵa bógip, ádettegi tazalyqtan jurdai bolatynymyzdy da aitady.
"Nelikten biz olarǵa tiisti kóńildi bólmeimiz? Osyndai jumysshylarmen sóilese otyryp, jalaqynyń tómendigi, jeńildikterdiń bolmaýy, sondai-aq áleýmettik nemqurailylyq olardyń kúndelikti shyndyǵy ekenin ańǵardyq. Búgingi tańda bul kisilerdiń basynda eńbekaqynyń tómendigi; naqty bekitilgen áleýmettik mártebeniń bolmaýy; ońaltý men saýyqtyrý nemese demalý úshin múmkindikteriniń shekteýligi; kásibi ósý men biliktiligin arttyrý jaǵdailarynyń bolmaýy syndy problemalar bar", – dep sóz tolyqtyrady Tańsáýle Serikov.
Depýtat árbir memlekettik jáne kvazimemlekettik mekemede mynandai qajetti sharalar qabyldaýy kerek dep sanaidy:
- jylyna bir ret osy sanattaǵy qyzmetkerlerge mekeme esebinen sanatoriige joldama berý;
- 13-shi jalaqy tóleý;
- jyl saiynǵy demalysqa shyqqan kezde eki jalaqy mólsherinde qosymsha járdemaqy berý;
- tegin oqytý jáne kásibi qaita daiarlyqtan ótýin qamtamasyz etý;
- zeinetkerlikke shyqqan tehnikalyq kásip ardagerleri úshin qurmetti ataqtar men kótermeleý nysandaryn engizý.
"Biz kúnde taza keńsege kelip, taza kóshelermen júrip, jyly qabyldaýlarǵa ábden daǵdylanǵanbyz. Biraq osynyń artynda jumysy "kórinbeitin" myńdaǵan jumysshylar baryn umytpańyz. Bul - tek materialdyq másele emes, adamgershilik pen ádilettilik máselesi. Jumysshy mamandyqtar jyly tek ádemi uranmen áspettelip qalmaýy kerek. Ol naqty árekettermen toltyrylýy tiis. Al bul rette birinshi qadam - kásibi ierarhiianyń tómengi jaǵyndaǵy adamdarǵa qamqorlyq jasaý", - dep sózin jalǵastyrady depýtat.
Sondai-aq ol atalǵan sanattaǵy qyzmetkerlerdiń jalaqysyn kóterýdi qarastyrýdy usynady.
"Olarǵa qatysty "Qoǵamdyq mańyzǵa ie mamandyqtaǵy jumysshylar" mártebesin zańnamalyq turǵyda bekitý kerek. Shipajaiǵa tegin joldamalar berý úshin memlekettik kvotalardy jyl saiyn bólý júiesin engizý qajet. Qaita daiarlaý jáne kásibi ósý kýrstaryna tegin qatysý múmkindigin qamtamasyz etýimiz tiis. Tehnikalyq mamandyqtardyń zeinet jasyndaǵylarǵa – eden jýýshylarǵa, aýla sypyrýshylarǵa, garderobshylarǵa jáne t.b. úshin qurmetti ataqtar men tósbelgilerdi engizý múmkindigin qarastyrý kerek", – dep usynady Serikov.
Aita ketsek, Eńbek resýrstaryn damytý ortalyǵynyń sarapshylary 2025 jyly eń kóp suranysqa ie 10-top jumysshy mamandyqtyń atyn atady.
