Májilis depýtaty Ábil Erkin Qazaqstannyń jańa Konstitýtsiia jobasynda tarihi sabaqtastyq qaǵidatynyń erekshe mánge ie ekenin málimdedi. Onyń aitýynsha, bul norma memlekettiń myńjyldyq damý tarihyn, ulttyq mádeni kodyn jáne basqarý tájiribesin quqyqtyq deńgeide aiqyndaidy, dep habarlaidy Dalanews.kz.
Depýtat «Uly dala» uǵymynyń Konstitýtsiiada kórinis tabýyn tarihi sabaqtastyqty zańnamalyq turǵyda bekitýdiń naqty dáleli dep atady.
– «Uly dala» uǵymy – emotsiialyq nemese poetikalyq tirkes emes. Bul – Qazaqstan memlekettiliginiń tarihi keńistigin, mádeni kodyn jáne jaýapkershilik filosofiiasyn bildiretin naqty uǵym. Tarihi sabaqtastyq eldiń ótkenin, búginin jáne bolashaǵyn jalǵaityn quqyqtyq kópir ispetti, – dedi Ábil Erkin.
Onyń aitýynsha, bul ustanym memlekettiń tereń tamyryn, ulttyq dástúri men órkeniettik sabaqtastyǵyn óz azamattaryna ǵana emes, halyqaralyq qaýymdastyqqa da aiqyn kórsetedi. Sonymen qatar depýtat tarihi sabaqtastyqty Konstitýtsiiada bekitý halyqaralyq tájiribege sai keletinin atap ótti.
– Qytai, Vengriia, Polsha, Litva sekildi memleketter óz Konstitýtsiialarynda tarihi sabaqtastyqty ulttyq egemendiktiń negizi retinde naqtylaǵan. Bul eshqandai bólinýshilikke nemese artyqshylyqqa ákelgen joq, kerisinshe, memlekettiń tutastyǵy men turaqtylyǵyn nyǵaitty, – dedi ol.
Ábil Erkin bul norma qoǵamdy bólmeitinin, kerisinshe ortaq tarih pen qundylyqtar tóńireginde biriktiretinin aitty. Ol Ábish Kekilbaevtyń «Eldikti, birlikti saqtaityn – adamdardyń ortaq oiy men ortaq múddesi» degen sózin mysalǵa keltirip, tarihi sananyń jas urpaq úshin de mańyzdy ekenin jetkizdi.
Sondai-aq depýtat jańa Konstitýtsiiada memlekettiń ýnitarly sipaty men basqarý úlgisi naqty aiqyndalǵanyna toqtaldy. Onyń aitýynsha, bul aýmaqtyq tutastyqty, quqyqtyq keńistiktiń birligin jáne basqarý júiesiniń aiqyndyǵyn qamtamasyz etetin mańyzdy norma.
– Jańa redaktsiiada «Qazaqstan Respýblikasy – ýnitarly memleket. Basqarý úlgisi – prezidenttik respýblika» dep naqty jazylǵan. Bul – turaqtylyq pen birtutastyqtyń kepili, – dedi ol.
Sonymen qatar Konstitýtsiianyń 3-babyndaǵy «Memlekettik biliktiń birden-bir bastaýy jáne egemendik iesi – Qazaqstan halqy» degen norma da naqtylanǵan. Depýtattyń pikirinshe, bul halyqtyń biliktiń naqty sýbektisi retinde tanylýyn bildiredi jáne memlekettiń zańdylyǵyn kúsheitedi.
Qorytyndylai kele, Ábil Erkin jańa Konstitýtsiiany jańa dáýirdiń quqyqtyq qańqasy dep atap, tarihi sabaqtastyq pen «Uly dala» uǵymy osy qańqany rýhani mazmunmen tolyqtyratynyn aitty.
– Tarihyna súiengen, egemendigin qorǵai biletin, birtutas memlekettilikti bekitken el ǵana bolashaǵyn nyq qura alady, – dep túiindedi depýtat.
