ءماجىلىس دەپۋتاتى تاڭساۋلە سەرىكوۆ زەينەت جاسىنداعى تەحنيكالىق كاسىپ يەلەرىنە، اتاپ ايتقاندا اۋلا سىپىرۋشىسى، ەدەن جۋۋشى، كيىم قابىلداۋشى سىندى ماماندارعا دا قۇرمەتتى اتاقتار تاعايىنداپ، ولاردى توسبەلگىلەرمەن ماراپاتتاۋدى ۇسىندى، دەپ حابارلايدى Dalanews.kz.
ول ءوزىنىڭ دەپۋتاتتىق ساۋالى ەڭبەگى كوبىنە دۇرىس باعالانا بەرمەيتىن قاراپايىم جۇمىسشىلارعا قاتىستى ەكەنىن اتاپ ءوتتى.
"جۇمىسشى مارتەبەسىن كوتەرۋ تۋرالى ايتقاندا، مۇنىمەن ءبىز نەنى قامتيمىز؟ بۇل مەكەمەنىڭ بەدەلىن كوتەرۋ عانا ەمەس، سونىمەن قاتار وسى مەكەمەدە جۇمىس ىستەيتىن قىزمەتكەردىڭ مارتەبەسىن كوتەرۋ تۋرالى دا بولۋى كەرەك. قوعامنىڭ تىنىس-تىرشىلىگىن قامتاماسىز ەتەتىن، كوزگە كورىنە بەرمەيتىن، ءبىراق اسا ماڭىزدى جۇمىستى ورىندايتىن مامانداردىڭ: اۋلا تازالاۋشىلاردىڭ، تەحنيكالىق قىزمەتكەرلەردىڭ، گاردەروبشىلاردىڭ، كۇزەتشىلەردىڭ، ۆاحتەرلەردىڭ، ەدەن جۋۋشىلاردىڭ جانە باسقا دا قوسالقى كاسىپ وكىلدەرىنىڭ مارتەبەسى مەن ەڭبەك جاعدايلارى ماسەلەسى ەرەكشە وزەكتى"، - دەدى دەپۋتات.
ول كوبىنەسە بىزدەردىڭ باسشىلىق جانە نەگىزگى ماماندارعا نازار اۋداراتىنىمىزدى اتاپ ءوتتى. ءبىراق الدەبىرەۋدىڭ اكەسى نەمەسە اعاسى بولىپ كەلەتىن ەسىك اۋزىنداعى كۇزەتشى نەمەسە الدەبىرەۋدىڭ اناسى نەمەسە اپكەسى بولىپ تابىلاتىن ەدەن جۋۋشىنى نازاردان تىس قالدىرىپ جاتامىز.
"ءيا، ولاردىڭ جۇمىسى كەرەمەت بەدەلگە يە ەمەس شىعار، ءبىراق ءبىز بۇل ادامداردىڭ ادامي، ازاماتتىق جانە الەۋمەتتىك مارتەبەسىن قۇرمەتتەۋگە جانە ونى كوتەرمەلەۋگە مىندەتتىمىز. ولاردىڭ دا بالالارى بار. ولار: "مەنىڭ انام ەدەن جۋۋشى، اكەم قاراۋىل» دەپ ماقتانىشپەن ايتا الادى ما؟ ءبىز ولاردىڭ وسىلاي ماقتاناتىنداي جاعداي جاساۋىمىز كەرەك. بۇگىنگى تاڭدا بۇل جۇمىسشىلاردىڭ جالاقىسى ورتاشا رەسپۋبليكالىق دەڭگەيدەن ەداۋىر تومەن. اۋىر فيزيكالىق جۇمىس ەكەندىگىنە قاراماستان، ولار كوبىنەسە الەۋمەتتىك قورعاۋ، ءتۇرلى جەڭىلدىكتەر مەن كاسىبي قولداۋدان دا تىس قالىپ جاتادى"، - دەدى تاڭساۋلە سەرىكوۆ.
دەپۋتات ەگەر وسى ادامدار كەم دەگەندە ءبىر كۇن جۇمىسقا شىقپاسا، كوشەلەر قوقىسقا تولىپ، كەڭسەلەر شاڭعا بوگىپ، ادەتتەگى تازالىقتان جۇرداي بولاتىنىمىزدى دا ايتادى.
"نەلىكتەن ءبىز ولارعا ءتيىستى كوڭىلدى بولمەيمىز؟ وسىنداي جۇمىسشىلارمەن سويلەسە وتىرىپ، جالاقىنىڭ تومەندىگى، جەڭىلدىكتەردىڭ بولماۋى، سونداي-اق الەۋمەتتىك نەمقۇرايلىلىق ولاردىڭ كۇندەلىكتى شىندىعى ەكەنىن اڭعاردىق. بۇگىنگى تاڭدا بۇل كىسىلەردىڭ باسىندا ەڭبەكاقىنىڭ تومەندىگى؛ ناقتى بەكىتىلگەن الەۋمەتتىك مارتەبەنىڭ بولماۋى؛ وڭالتۋ مەن ساۋىقتىرۋ نەمەسە دەمالۋ ءۇشىن مۇمكىندىكتەرىنىڭ شەكتەۋلىگى؛ كاسىبي ءوسۋ مەن بىلىكتىلىگىن ارتتىرۋ جاعدايلارىنىڭ بولماۋى سىندى پروبلەمالار بار"، – دەپ ءسوز تولىقتىرادى تاڭساۋلە سەرىكوۆ.
دەپۋتات ءاربىر مەملەكەتتىك جانە كۆازيمەملەكەتتىك مەكەمەدە مىنانداي قاجەتتى شارالار قابىلداۋى كەرەك دەپ سانايدى:
- جىلىنا ءبىر رەت وسى ساناتتاعى قىزمەتكەرلەرگە مەكەمە ەسەبىنەن ساناتورييگە جولداما بەرۋ؛
- 13ء-شى جالاقى تولەۋ؛
- جىل سايىنعى دەمالىسقا شىققان كەزدە ەكى جالاقى مولشەرىندە قوسىمشا جاردەماقى بەرۋ؛
- تەگىن وقىتۋ جانە كاسىبي قايتا دايارلىقتان ءوتۋىن قامتاماسىز ەتۋ؛
- زەينەتكەرلىككە شىققان تەحنيكالىق كاسىپ ارداگەرلەرى ءۇشىن قۇرمەتتى اتاقتار مەن كوتەرمەلەۋ نىساندارىن ەنگىزۋ.
"ءبىز كۇندە تازا كەڭسەگە كەلىپ، تازا كوشەلەرمەن ءجۇرىپ، جىلى قابىلداۋلارعا ابدەن داعدىلانعانبىز. ءبىراق وسىنىڭ ارتىندا جۇمىسى "كورىنبەيتىن" مىڭداعان جۇمىسشىلار بارىن ۇمىتپاڭىز. بۇل - تەك ماتەريالدىق ماسەلە ەمەس، ادامگەرشىلىك پەن ادىلەتتىلىك ماسەلەسى. جۇمىسشى ماماندىقتار جىلى تەك ادەمى ۇرانمەن اسپەتتەلىپ قالماۋى كەرەك. ول ناقتى ارەكەتتەرمەن تولتىرىلۋى ءتيىس. ال بۇل رەتتە ءبىرىنشى قادام - كاسىبي يەرارحيانىڭ تومەنگى جاعىنداعى ادامدارعا قامقورلىق جاساۋ"، - دەپ ءسوزىن جالعاستىرادى دەپۋتات.
سونداي-اق ول اتالعان ساناتتاعى قىزمەتكەرلەردىڭ جالاقىسىن كوتەرۋدى قاراستىرۋدى ۇسىنادى.
"ولارعا قاتىستى "قوعامدىق ماڭىزعا يە ماماندىقتاعى جۇمىسشىلار" مارتەبەسىن زاڭنامالىق تۇرعىدا بەكىتۋ كەرەك. شيپاجايعا تەگىن جولدامالار بەرۋ ءۇشىن مەملەكەتتىك كۆوتالاردى جىل سايىن ءبولۋ جۇيەسىن ەنگىزۋ قاجەت. قايتا دايارلاۋ جانە كاسىبي ءوسۋ كۋرستارىنا تەگىن قاتىسۋ مۇمكىندىگىن قامتاماسىز ەتۋىمىز ءتيىس. تەحنيكالىق ماماندىقتاردىڭ زەينەت جاسىنداعىلارعا – ەدەن جۋۋشىلارعا، اۋلا سىپىرۋشىلارعا، گاردەروبشىلارعا جانە ت.ب. ءۇشىن قۇرمەتتى اتاقتار مەن توسبەلگىلەردى ەنگىزۋ مۇمكىندىگىن قاراستىرۋ كەرەك"، – دەپ ۇسىنادى سەرىكوۆ.
ايتا كەتسەك، ەڭبەك رەسۋرستارىن دامىتۋ ورتالىعىنىڭ ساراپشىلارى 2025 جىلى ەڭ كوپ سۇرانىسقا يە 10-توپ جۇمىسشى ماماندىقتىڭ اتىن اتادى.
