Jambyl oblysynyń Merki aýdanynda asfaltty talapqa sai tósemegen qurylys kompaniialarynyń áreketi jergilikti turǵyndardyń narazylyǵyn týdyrdy, dep habarlaidy Dalanews.kz.
Al aýyl ákimderi jumysy tolyq aiaqtalmaǵan merdigerlerge 305 million teńge aýdarǵan.
Máselen, Aqaral aýylynda asfalt tóseý sapasy talaptarǵa múlde sáikes kelmegen. Alǵashynda merdigerler joldy tar etip jasaǵan, keiin turǵyndardyń talabynan soń keńeitýge tyrysypty. Alaida kompaniianyń jabdyqtary tolyq bolmaǵandyqtan, bitýmdy topyraq ústine sháýgimmen quiǵan. Aýyl turǵyny Rysbúbi Jumataeva merdigerlerdiń jumysyn synap, eki kólik ótetin joldyń tym tar ekenin jáne kei bólikteriniń bitpei qalǵanyn aitty.
Aýdandyq joldardy basqarýǵa jaýapty bólim basshysy Erbol Akek aýyl kóshelerin asfalttaýǵa bólingen qarajat kólemin naqty bilmeitinin moiyndady, biraq kemshilikterdi joiýǵa ýáde berdi.
“Tehnikanyń bári daiyn, tek asfalt tóseýshi maman tappai otyrmyz. Jaqyn kúnderi másele sheshiledi dep senemiz”, – dep túsindirdi ol 24kz agenttigine.
Bul másele tek Aqaral aýylymen shektelmei, Sarmoldaev pen Aqermen eldi mekenderiniń ákimderin de qamtydy. Osy aýyldardaǵy 20 kóshe asfalttalýǵa tiis edi, alaida keibir joldar tolyq aiaqtalmaǵan nemese qalyńdyǵy talapqa sai kelmeidi. 67 million teńgege jasalýy tiis jumystardyń múlde oryndalmaǵany anyqtaldy. Sybailas jemqorlyqqa qarsy departament qyzmetkerleri buzýshylyqtardy der kezinde tirkep, úsh aýyl ákimine sógis berildi.
“Joldar tolyǵymen paidalanýǵa berilgende, aýyl ákimderi tártiptik emes, qylmystyq jaýapkershilikke tartylar edi”, – dep túsindirdi 24kz agenttigine SJQIQA jol basqarmasy basshysynyń orynbasary Qairat Báigebaev.
Antikor qyzmetiniń aralasýynan keiin ákimder men merdigerler jumysty talapqa sai aiaqtaýǵa ýáde berdi. Jalpy, biyl aýdan joldaryn jóndeýge 1 milliard 647 million teńge bólinip, bul qarajattyń igerilýi endi muqiiat baqylanatyn bolady.
