جامبىل وبلىسىنىڭ مەركى اۋدانىندا اسفالتتى تالاپقا ساي توسەمەگەن قۇرىلىس كومپانيالارىنىڭ ارەكەتى جەرگىلىكتى تۇرعىنداردىڭ نارازىلىعىن تۋدىردى، دەپ حابارلايدى Dalanews.kz.
ال اۋىل اكىمدەرى جۇمىسى تولىق اياقتالماعان مەردىگەرلەرگە 305 ميلليون تەڭگە اۋدارعان.
ماسەلەن، اقارال اۋىلىندا اسفالت توسەۋ ساپاسى تالاپتارعا مۇلدە سايكەس كەلمەگەن. العاشىندا مەردىگەرلەر جولدى تار ەتىپ جاساعان، كەيىن تۇرعىنداردىڭ تالابىنان سوڭ كەڭەيتۋگە تىرىسىپتى. الايدا كومپانيانىڭ جابدىقتارى تولىق بولماعاندىقتان، بيتۋمدى توپىراق ۇستىنە شاۋگىممەن قۇيعان. اۋىل تۇرعىنى ءرىسبۇبى جۇماتايەۆا مەردىگەرلەردىڭ جۇمىسىن سىناپ، ەكى كولىك وتەتىن جولدىڭ تىم تار ەكەنىن جانە كەي بولىكتەرىنىڭ بىتپەي قالعانىن ايتتى.
اۋداندىق جولداردى باسقارۋعا جاۋاپتى ءبولىم باسشىسى ەربول اكەك اۋىل كوشەلەرىن اسفالتتاۋعا بولىنگەن قاراجات كولەمىن ناقتى بىلمەيتىنىن مويىندادى، ءبىراق كەمشىلىكتەردى جويۋعا ۋادە بەردى.
“تەحنيكانىڭ ءبارى دايىن، تەك اسفالت توسەۋشى مامان تاپپاي وتىرمىز. جاقىن كۇندەرى ماسەلە شەشىلەدى دەپ سەنەمىز”، – دەپ ءتۇسىندىردى ول 24kz اگەنتتىگىنە.
بۇل ماسەلە تەك اقارال اۋىلىمەن شەكتەلمەي، سارمولدايەۆ پەن اقەرمەن ەلدى مەكەندەرىنىڭ اكىمدەرىن دە قامتىدى. وسى اۋىلدارداعى 20 كوشە اسفالتتالۋعا ءتيىس ەدى، الايدا كەيبىر جولدار تولىق اياقتالماعان نەمەسە قالىڭدىعى تالاپقا ساي كەلمەيدى. 67 ميلليون تەڭگەگە جاسالۋى ءتيىس جۇمىستاردىڭ مۇلدە ورىندالماعانى انىقتالدى. سىبايلاس جەمقورلىققا قارسى دەپارتامەنت قىزمەتكەرلەرى بۇزۋشىلىقتاردى دەر كەزىندە تىركەپ، ءۇش اۋىل اكىمىنە سوگىس بەرىلدى.
“جولدار تولىعىمەن پايدالانۋعا بەرىلگەندە، اۋىل اكىمدەرى تارتىپتىك ەمەس، قىلمىستىق جاۋاپكەرشىلىككە تارتىلار ەدى”، – دەپ ءتۇسىندىردى 24kz اگەنتتىگىنە ءسجقىقا جول باسقارماسى باسشىسىنىڭ ورىنباسارى قايرات بايگەبايەۆ.
انتيكور قىزمەتىنىڭ ارالاسۋىنان كەيىن اكىمدەر مەن مەردىگەرلەر جۇمىستى تالاپقا ساي اياقتاۋعا ۋادە بەردى. جالپى، بيىل اۋدان جولدارىن جوندەۋگە 1 ميلليارد 647 ميلليون تەڭگە ءبولىنىپ، بۇل قاراجاتتىڭ يگەرىلۋى ەندى مۇقيات باقىلاناتىن بولادى.
