Durys-aq, bizdiń Otan qorǵaýshylar, búgingi áskerimiz – Batý han men Ketbuǵa bastap jarty álemdi jaýlaǵan, Qabanbai men Bógenbai qolbasshy bolyp Uly dalany qorǵaǵan, han Kene men Mahambet bolyp azattyqty ańsaǵan, Baýyrjan men Raxymjandar bastap fashisterden Keńes odaǵynyń astanasy bolǵan Maskeýdi ǵana emes, adamzatty qorǵaǵan qazaq qarýly kúshteriniń jalǵasy. Sol qazaq qarýly kúshteri jańa zamanda aǵymǵa sai qaita qurylylyp, Egemen eldiń qaýipsizdigin qadaǵalaýdy mindetterine alyp otyr.
Búgingi aibyndy armiiamyz úshin eldiń tynyshtyǵyn saqtap, táýelsizdiktiń qorǵany bolý mártebeli zor mindet ekenin, 2017 jyly QR Qarýly Kúshteriniń 25 jyldyǵyna arnalyp ótkizilgen segizinshi áskeri sherýge sol kezdegi prezident Elbasy Nursultan Nazarbaev ta aitqan edi.
«Bahadúr babalar uly dalamyzdy aq bilektiń kúshimen, aq naizanyń ushymen qorǵap bizge amanat etip qaldyrdy. «Urandy eldiń urpaǵy aibarly keledi» degen dana halqymyz. Jaý júrek jaýyngerlerdiń kóteretin júgi aýyr, biraq ol abyroily borysh, qasterli paryz. Qarýly kúshterimiz – halqymyzdyń senimdi tiregi, memlekettiń berik qalqany. Jaýyngerlik tý – týǵan jerge adaldyqtyń, erlik pen batyrlyqtyń nyshany. Qasietti bairaq rýhy biik, er júrek sarbazdardy árdaiym jeńiske jeteleidi»,- degen Elbasy.
Desek te, búgingi kúni úshin Otan qorǵaý - tek áskerdiń ǵana mindeti emes, ár azamattyń mindeti. Ár azamat azat eliniń mańgilik bolýyn qalaidy. Sol úshin azamattarymyz azatyǵymyzǵa, eldiń turaqtylyǵyna, memleketimizdiń gúldenip damýyna, turǵyndarymyzdyń densaýlyǵyna ziian keltiretin árekettiń barlyǵyna qarsylaq kórsetedi. Sondyqtan Otan qorǵaýshylar kúni tek jigitterdiń ǵana emes, tutas qazaq xalyqynyń ulttyq merekesi. Bul bizdiń óz ózimizdi qorǵai alýǵa qabylettiligimizdi tanytatyn mereke. Qazaqstannyń bar azamaty Qazaq Eliniń otan qorqaýshysy.
Búgingi kúnde Otan qorǵaý qolǵa qarý alyp, áskerge barý ǵana emes. Ár azamat básekege qabyletti, óz salasynda bilikti maman bolýy arqyly da Otannyń qorǵaidy. Zaman talabyna sai Otan qorǵaýdyń basty qarýy bilim men ǵylym. Ár azamat bilikti de, bilimdi bolsa kez-kelgen salada eliniń múddesin qorǵap qalady. Sonymen birge, Otandy qorǵaý halyqtyń birligi men azamattardyń jaýapkershiligi. Otan qorǵaýdyń basty qarýy – bilim
men ǵylym, bereke men tártip ekenin álemge taraǵan koronavirýs pandemiiasy kezinde de kórdik. Koronavirýstan Otanymyzdy qorǵap qalýda elimizdiń, azamattarymyzdyń birligi, densaýlyq saqtaý salasy mamandarynyń biliktiligi men qajyr qairaty, eldegi qaýipsizdik kúshterdiń tártipti qadaǵalýy bir-birin tolyqtyrdy. Bul indet kezinde bizdiń otan qorǵaýshylar elin qorǵaityn qarý jasap shyqty. Ol – koronavirýsqa qarsy otandyq QazVac (QazCovid-in) vaktsinasy. Bul vaktsinany daiyndaǵan Biologiialyq qaýipsizdik máseleleri jónindegi ǵylymi-zertteý institýtynyń mamandary otanyn qorǵaǵan jankeshti jaýynger deýge bolady.
Osy siiaqty endigi kezekte Otan qorǵaýshylarymyzdyń aldynda koronavirýstan keiingi el ekonomikasyn qalpyna keltý men elimizdiń turaqtylyǵyn qamtamasyz etý, sybailas jemqorlyqqa qarsy turý, shaǵyn jáne orta biznesti, ǵylym men tehnikany damytý siiaqty birneshe mindet tur. Bul synnan da eldiń birligi men qajyr-qairatynyń, el azamattarynyń, jastardyń tyń ideiialary men biliminiń negizinde óterimizge shúbá joq. Azamattarymyz ǵylym men bilimge qushtar bolyp, elimizge, jalpy adamzat pen tabiǵatqa eń paidaly jobalar jasap jatsa, onyń bárin naǵyz otan qorǵaýshylar bolmaq.
Otan qorǵaýda toqtalarymyz myna Turan dalasyn qorǵap ótken babalarymyzdyń «Bilekke sengen zamanda eshkimge ese bermedik, bilimge sengen zamanda qapy qalyp júrmelik»,- degen danalyq sózi bolmaq.
Turdybek QURMETQAN
Ál-Farabi atyndaǵy QazUÝ,
Aqparattyq júieler kafedrasynyń oqytýshysy
