L.N. Gýmilev atyndaǵy Eýraziia ulttyq ýniversitetiniń professory, geografiia ǵylymdarynyń doktory Marat Ishanqulov Qazaqstan prezidentine úndeý jasap, alaiaqtardyń qurbany bolǵanyn aitty. Onyń sózinshe, ol jalǵyz baspanasy men ómir boiy jinaǵan qarajatynan aiyrylǵan, dep habarlaidy dalanews.kz.
Alaiaqtar ózin ýniversitet qyzmetkerleri retinde tanystyrǵan
Ǵalymnyń stýdentteriniń aitýynsha, birneshe ai boiy belgisiz adamdar Marat Ishanqulovqa telefon shalyp, WhatsApp arqyly habarlama jiberip otyrǵan. Olar ózderin ýniversitet qyzmetkerleri, zańgerler jáne memlekettik organdardyń ókilderi retinde tanystyrǵan.
Stýdentterdiń sózinshe, alaiaqtar birtindep professordyń senimine kirip, túrli nusqaýlaryn oryndatqan.
Páterin satyp, aqshasyn dollarǵa aiyrbastaǵan
Stýdentterdiń málimetinshe, egde jastaǵy ǵalym Astanadaǵy páterin 39 million teńgege satyp jibergen. Odan keiin ol banktegi qarajatyn sheship alyp, ony dollarǵa aiyrbastaǵan. Keiin shamamen 71,4 myń dollardy kýrer arqyly belgisiz adamdarǵa bergen. Oqiǵa boiynsha politsiiaǵa aryz túsirilgennen keiin qylmystyq is qozǵalǵan.
Stýdentterdiń aitýynsha, tergeý barysynda urlanǵan aqsha tabylyp, qaitarylǵan.
Aqshany zańgerge senip tapsyrǵan
Alaida oqiǵa munymen aiaqtalmaǵan. Stýdentterdiń nusqasyna sáikes, professordyń múddesin qorǵaýǵa tiis bolǵan zańger sot protsesteri aiaqtalǵanǵa deiin qarajatty saqtaýǵa berý qajettigin aitqan. Marat Ishanqulovtyń aitýynsha, osydan keiin ol aqshasyn qaitara almaǵan.
Professor prezidentten kómek surady
88 jastaǵy ǵalym qazir jalǵyz baspanasynan da aiyrylyp qalýy múmkin ekenin málimdedi. Ol memleket basshysynan istiń ádil ári obektivti tergelýin qamtamasyz etýdi surady. Stýdentteri ustazyn qorǵaýǵa shyqty
Professordy onyń shákirtteri de qoldap otyr.
Olar Marat Ishanqulovtyń 88 jasta ekenin, onyń balalary men nemereleri joq ekenin atap ótti. Stýdentterdiń aitýynsha, ǵalymnyń múddesin qorǵaityn jaqyn týystary bolmaǵandyqtan, olar ustazdarynyń jaǵdaiyna alańdap otyrǵandaryn jetkizdi.
