دۇرىس-اق، ءبىزدىڭ وتان قورعاۋشىلار، بۇگىنگى اسكەرىمىز – باتۋ حان مەن كەتبۇعا باستاپ جارتى الەمدى جاۋلاعان، قابانباي مەن بوگەنباي قولباسشى بولىپ ۇلى دالانى قورعاعان، حان كەنە مەن ماحامبەت بولىپ ازاتتىقتى اڭساعان، باۋىرجان مەن راxىمجاندار باستاپ فاشيستەردەن كەڭەس وداعىنىڭ استاناسى بولعان ماسكەۋدى عانا ەمەس، ادامزاتتى قورعاعان قازاق قارۋلى كۇشتەرىنىڭ جالعاسى. سول قازاق قارۋلى كۇشتەرى جاڭا زاماندا اعىمعا ساي قايتا قۇرىلىلىپ، ەگەمەن ەلدىڭ قاۋىپسىزدىگىن قاداعالاۋدى مىندەتتەرىنە الىپ وتىر.
بۇگىنگى ايبىندى ارميامىز ءۇشىن ەلدىڭ تىنىشتىعىن ساقتاپ، تاۋەلسىزدىكتىڭ قورعانى بولۋ مارتەبەلى زور مىندەت ەكەنىن، 2017 جىلى ق ر قارۋلى كۇشتەرىنىڭ 25 جىلدىعىنا ارنالىپ وتكىزىلگەن سەگىزىنشى اسكەري شەرۋگە سول كەزدەگى پرەزيدەنت ەلباسى نۇرسۇلتان نازاربايەۆ تا ايتقان ەدى.
«ءباھادۇر بابالار ۇلى دالامىزدى اق بىلەكتىڭ كۇشىمەن، اق نايزانىڭ ۇشىمەن قورعاپ بىزگە امانات ەتىپ قالدىردى. «ۇراندى ەلدىڭ ۇرپاعى ايبارلى كەلەدى» دەگەن دانا حالقىمىز. جاۋ جۇرەك جاۋىنگەرلەردىڭ كوتەرەتىن جۇگى اۋىر، ءبىراق ول ابىرويلى بورىش، قاستەرلى پارىز. قارۋلى كۇشتەرىمىز – حالقىمىزدىڭ سەنىمدى تىرەگى، مەملەكەتتىڭ بەرىك قالقانى. جاۋىنگەرلىك تۋ – تۋعان جەرگە ادالدىقتىڭ، ەرلىك پەن باتىرلىقتىڭ نىشانى. قاسيەتتى بايراق رۋحى بيىك، ەر جۇرەك ساربازداردى ءاردايىم جەڭىسكە جەتەلەيدى»،- دەگەن ەلباسى.
دەسەك تە، بۇگىنگى كۇنى ءۇشىن وتان قورعاۋ - تەك اسكەردىڭ عانا مىندەتى ەمەس، ءار ازاماتتىڭ مىندەتى. ءار ازامات ازات ەلىنىڭ ماڭگىلىك بولۋىن قالايدى. سول ءۇشىن ازاماتتارىمىز ازاتىعىمىزعا، ەلدىڭ تۇراقتىلىعىنا، مەملەكەتىمىزدىڭ گۇلدەنىپ دامۋىنا، تۇرعىندارىمىزدىڭ دەنساۋلىعىنا زيان كەلتىرەتىن ارەكەتتىڭ بارلىعىنا قارسىلاق كورسەتەدى. سوندىقتان وتان قورعاۋشىلار كۇنى تەك جىگىتتەردىڭ عانا ەمەس، تۇتاس قازاق xالىقىنىڭ ۇلتتىق مەرەكەسى. بۇل ءبىزدىڭ ءوز ءوزىمىزدى قورعاي الۋعا قابىلەتتىلىگىمىزدى تانىتاتىن مەرەكە. قازاقستاننىڭ بار ازاماتى قازاق ەلىنىڭ وتان قورقاۋشىسى.
بۇگىنگى كۇندە وتان قورعاۋ قولعا قارۋ الىپ، اسكەرگە بارۋ عانا ەمەس. ءار ازامات باسەكەگە قابىلەتتى، ءوز سالاسىندا بىلىكتى مامان بولۋى ارقىلى دا وتاننىڭ قورعايدى. زامان تالابىنا ساي وتان قورعاۋدىڭ باستى قارۋى ءبىلىم مەن عىلىم. ءار ازامات بىلىكتى دە، ءبىلىمدى بولسا كەز-كەلگەن سالادا ەلىنىڭ مۇددەسىن قورعاپ قالادى. سونىمەن بىرگە، وتاندى قورعاۋ حالىقتىڭ بىرلىگى مەن ازاماتتاردىڭ جاۋاپكەرشىلىگى. وتان قورعاۋدىڭ باستى قارۋى – ءبىلىم
مەن عىلىم، بەرەكە مەن ءتارتىپ ەكەنىن الەمگە تاراعان كوروناۆيرۋس پاندەمياسى كەزىندە دە كوردىك. كوروناۆيرۋستان وتانىمىزدى قورعاپ قالۋدا ەلىمىزدىڭ، ازاماتتارىمىزدىڭ بىرلىگى، دەنساۋلىق ساقتاۋ سالاسى ماماندارىنىڭ بىلىكتىلىگى مەن قاجىر قايراتى، ەلدەگى قاۋىپسىزدىك كۇشتەردىڭ ءتارتىپتى قاداعالۋى ءبىر-بىرىن تولىقتىردى. بۇل ىندەت كەزىندە ءبىزدىڭ وتان قورعاۋشىلار ەلىن قورعايتىن قارۋ جاساپ شىقتى. ول – كوروناۆيرۋسقا قارسى وتاندىق QazVac (QazCovid-in) ۆاكسيناسى. بۇل ۆاكسينانى دايىنداعان بيولوگيالىق قاۋىپسىزدىك ماسەلەلەرى جونىندەگى عىلىمي-زەرتتەۋ ينستيتۋتىنىڭ ماماندارى وتانىن قورعاعان جانكەشتى جاۋىنگەر دەۋگە بولادى.
وسى سياقتى ەندىگى كەزەكتە وتان قورعاۋشىلارىمىزدىڭ الدىندا كوروناۆيرۋستان كەيىنگى ەل ەكونوميكاسىن قالپىنا كەلتۋ مەن ەلىمىزدىڭ تۇراقتىلىعىن قامتاماسىز ەتۋ، سىبايلاس جەمقورلىققا قارسى تۇرۋ، شاعىن جانە ورتا بيزنەستى، عىلىم مەن تەحنيكانى دامىتۋ سياقتى بىرنەشە مىندەت تۇر. بۇل سىننان دا ەلدىڭ بىرلىگى مەن قاجىر-قايراتىنىڭ، ەل ازاماتتارىنىڭ، جاستاردىڭ تىڭ يدەيالارى مەن ءبىلىمىنىڭ نەگىزىندە وتەرىمىزگە ءشۇبا جوق. ازاماتتارىمىز عىلىم مەن بىلىمگە قۇشتار بولىپ، ەلىمىزگە، جالپى ادامزات پەن تابيعاتقا ەڭ پايدالى جوبالار جاساپ جاتسا، ونىڭ ءبارىن ناعىز وتان قورعاۋشىلار بولماق.
وتان قورعاۋدا توقتالارىمىز مىنا تۇران دالاسىن قورعاپ وتكەن بابالارىمىزدىڭ «بىلەككە سەنگەن زاماندا ەشكىمگە ەسە بەرمەدىك، بىلىمگە سەنگەن زاماندا قاپى قالىپ جۇرمەلىك»،- دەگەن دانالىق ءسوزى بولماق.
تۇردىبەك قۇرمەتقان
ءال-فارابي اتىنداعى قازۇۋ،
اقپاراتتىق جۇيەلەر كافەدراسىنىڭ وقىتۋشىسى
