Ótken demalysta Bolat Baqaýov «Pavlodar» arnaıy ekonomıkalyq aımaǵyndaǵy birqatar kásiporyndardy aralap, 2019 jyldyń qorytyndysyna arnalǵan jıynǵa qatysty. Aımaq basshysy «Severhım» JSHS, «ASKOR» JSHS, «ErtisNefteServıs» JSHS, «VEKTOR – Pavlodar» JSHS, «Rosdorkom» JSHS, «RTF Pvl» JSHS qolǵa alǵan jobalardyń barysymen tanysty.
[caption id="attachment_48798" align="alignright" width="320"]
Álibek Nesipbekov[/caption]
«Pavlodar» arnaıy ekonomıkalyq aımaǵy basqarýshy kompanıasynyń basqarma tóraǵasy Álibek Nesipbekovtiń sózinshe, bıyl arnaıy aımaqtaǵy kásiporyndar 43,4 mlrd teńgeniń ónimin óndirgen. Kórsetkish 2018 jylmen salystyrǵanda 1,6 ese joǵary. Ótken jyly mundaǵy kásiporyndar 27 mlrd teńgeniń ónimin shyǵarǵan edi.
– Bıyl 16 mlrd teńgeniń ónimi eksporttaldy. Byltyrǵy jylmen salystyrǵanda kórsetkish 1,3 ese joǵary, – dedi Álibek Nesipbekov. – Salyqtyq túsimder de 1,4 ese artty. Mundaǵy kásiporyndar 2019 jyly qazynaǵa 2,2 mlrd teńge kóleminde salyq tóledi. Memlekettiń 1 teńgesine 12,5 teńge jeke ınvestısıa tartylǵanyn da atap ótken abzal.
Eske sala keteıik, búginde «Pavlodar» arnaıy ekonomıkalyq aımaǵynda 283 mlrd teńgege barlyǵy 38 joba júzege asyrylyp jatyr. Onyń 10-y naqty jumys istep tur. 10 jobanyń qurylysy júrip jatyr. Keler jyly 7 jobanyń qurylys-montaj jumystary bastalady. Taǵy 11 joba pysyqtalý ústinde.
– Jumys istep turǵan 10 jobaǵa 76 mlrd teńge ınvestısıa salyndy. Onyń 24 paıyzy nemese 18 mlrd teńgesi – sheteldik ınvestısıa. 1670 jumys orny ashyldy. Ótken jylmen salystyrǵanda jumys oryndarynyń sany 220 birlikke kóbeıdi, – dedi Álibek Nesipbekov.
Onyń aıtýynsha, keler jyly 10 joba paıdalanýǵa berilmek.
«Pavlodar» arnaıy ekonomıkalyq aımaǵy 1200 gektar jerdi alyp jatyr. Búginde onyń tek 360 gektary paıdalanylǵan.
Bolat Baqaýov «Pavlodar» arnaıy ekonomıkalyq aımaǵyndaǵy jumystardy odan ári jandandyrýdy tapsyrdy. Sondaı-aq, sanǵa emes, sapaǵa erekshe mán berý kerektigin eskertti.
Pavlodar oblysy ákiminiń baspasóz qyzmeti
