Búgin, 14 aqpanda KAZENERGY qaýymdastyǵynyń basshylyǵyndaǵy kadrlyq ózgeristerge qatysty kezekten tys jinalys ótip, jańa tóraǵa sailandy. Is-sharaǵa qaýymdastyq quramyna kiretin kompaniialardyń basshylary qatysty, dep jazady Dalanews.kz kompaniianyń baspasóz qyzmetine silteme jasap.
Memleket basshysynyń keńesshisi bolyp taǵaiyndalǵan Maǵzum Myrzaǵaliev KAZENERGY tóraǵasy retindegi ókilettiginiń toqtatylǵany týraly habarlap, bul laýazymǵa Bolat Aqsholaqovtyń kandidatýrasyn usyndy.
"Bolat Oraluly "QazMunaiGaz" UK AQ, "Qazatomónerkásip" UAK" AQ, "Samuryq-Qazyna" UÁQ" AQ siiaqty iri ulttyq kompaniialardaǵy basshylyq laýazymdarda úlken jumys tájiribesi bar. Sondai-aq ol QR Energetika ministri jáne Memleket basshysynyń keńesshisi siiaqty joǵary memlekettik qyzmetterdi atqardy. Sonymen qatar, Bolat Oraluly bizdiń qaýymdastyqty eki ret Bas direktor retinde basqardy jáne onyń esimi kásibi ortada keńinen tanymal", – dep atap ótti Maǵzum Myrzaǵaliev.
Bolat Aqsholaqovtyń kandidatýrasyn KAZENERGY qaýymdastyǵyna múshe barlyq kompaniialar biraýyzdan qoldady. Jinalysqa qatysýshylar Maǵzum Myrzaǵalievke elimizdiń energetika salasyn damytýǵa qosqan eleýli úlesi úshin alǵys bildirdi.
Buǵan deiin saitymyzda Memleket basshysynyń ókimimen Maǵzum Myrzaǵalievtyń Bolat Aqsholaqovtyń ornyn basyp, QR Prezidentiniń keńesshisi laýazymyna taǵaiyndalǵanyn jazǵanbyz.
