Qazaqstanda Úkimet eskertkendei, benzin baǵasy aqyryndap ósip jatyr. Ásirese, jii suranysqa ie AI-92 markaly benzinniń baǵasy sońǵy bir aida 0,4%, bir jylda 1,8%-ǵa ósken. AI-95/96 markaly benzin baǵasy bir jylda 4,3%, al AI-98 3,2%-ǵa qymbattaǵan, dep habarlaidy Dalanews.kz.
Energyprom.kz usynǵan bul taldaýdan óńirlerdegi baǵada aiyrma baryn baiqaýǵa bolady.
Qai óńirlerde benzin qatty qymbattady?
Sońǵy bir aida benzin baǵasy, ásirese Jambyl oblysynda aitarlyqtai ósti – 1%. Sondai-aq Abai, Túrkistan oblystary men Shymkentte de janar-jaǵarmai 0,8%-ǵa qymbattady.
Kerisinshe, Aqtóbe men Ulytaý oblystarynda, sondai-aq Almaty qalasynda sońǵy aida baǵa ózgermegen. Al Batys Qazaqstan oblysyndaǵy baǵa, tipti sál arzandaǵan (0,1%).
Jyldyq kórsetkishte benzin qatty qymbattaǵan óńirler – BQO (4,8%), Aqtóbe (4,1%) oblysy jáne Shymkent qalasy (3,1%). Baǵa ekpini eń báseń óńirler – Almaty qalasy (0,9%), Aqmola (1,1%) jáne Jetisý (1,7%) oblystary.
Qai qalada benzin qatty qymbat?
AI-92 benzininiń ortasha baǵasy – 205 teńge. Eń qymbat baǵa Petropavlda tirkelip otyr: 209 teńge, eń arzan baǵa Atyraýǵa tiesili: 195 teńge.
AI-95/96 markaly benzinniń ortasha baǵasy – 264 teńge. Eń joǵary baǵa Taldyqorǵanda (274 teńge), eń tómen baǵa – Atyraýda (243 teńge) tirkelgen.
AI-98 benzini Almatyda qatty qymbat – 315 teńge, al eń arzany Aqtóbede eken: 283 teńge.
Qazaqstan janar-jaǵarmaimen ózin tolyq qamtamasyz ete alyp otyr ma?
Jyl basynan beri Qazaqstan ishki naryqtaǵy janar-jaǵarmaiǵa degen suranysty tolyqtai derlik ózi qamtamasyz etip otyr. Elimizde qańtar-aqpan ailarynda 1,1 mln tonna benzin óndirilse, bul - byltyrǵy jylmen salystyrǵanda 20,8%-ǵa kóp kólem.
Benzin importy, kerisinshe 8,1%-ǵa azaiyp, bar-joǵy 101,8 tonnany qurady. Al Qazaqstannyń ózi osy kezeńde 6,7 myń tonna benzin eksporttap, túgelimen Ózbekstan naryǵyna ótkizgen.
"Benzin baǵasynyń kóterilýi aldaǵy ýaqytta kólik qyzmetteri men jalpy naryqtaǵy basqa taýarlar baǵasyna áser etýi yqtimal. Sebebi benzinniń árbir teńgege qymbattaýy – túptep kelgende, qarapaiym halyqtyń qaltasyna túsetin qosymsha salmaq", - deidi sarapshylar.
Buǵan deiin saitymyzda "Bul áli basy". Birneshe óńirde janar-jaǵarmai baǵasy qymbattap úlgerdi" degen material jariialanǵan bolatyn. Sondai-aq bizdegi "Memlekettik retteý alynyp, janar-jaǵarmai men dizel otynynyń baǵalary erkine jiberildi" degen maqalamen de tanysa otyryńyzdar. Biyl qańtar aiynda Energetika ministri Almas Sátqaliev janar-jaǵarmai baǵasy aqpannan bastap qymbattaitynyn,bul taýar túri jyl sońyna deiin shamalylap ústeme baǵa qosyp otyratynyn aitqan edi.
