قازاقستاندا ۇكىمەت ەسكەرتكەندەي، بەنزين باعاسى اقىرىنداپ ءوسىپ جاتىر. اسىرەسە، ءجيى سۇرانىسقا يە اي-92 ماركالى بەنزيننىڭ باعاسى سوڭعى ءبىر ايدا 0،4%، ءبىر جىلدا 1،8%-عا وسكەن. اي-95/96 ماركالى بەنزين باعاسى ءبىر جىلدا 4،3%، ال اي-98 3،2%-عا قىمباتتاعان، دەپ حابارلايدى Dalanews.kz.
Energyprom.kz ۇسىنعان بۇل تالداۋدان وڭىرلەردەگى باعادا ايىرما بارىن بايقاۋعا بولادى.
قاي وڭىرلەردە بەنزين قاتتى قىمباتتادى؟
سوڭعى ءبىر ايدا بەنزين باعاسى، اسىرەسە جامبىل وبلىسىندا ايتارلىقتاي ءوستى – 1%. سونداي-اق اباي، تۇركىستان وبلىستارى مەن شىمكەنتتە دە جانار-جاعارماي 0،8%-عا قىمباتتادى.
كەرىسىنشە، اقتوبە مەن ۇلىتاۋ وبلىستارىندا، سونداي-اق الماتى قالاسىندا سوڭعى ايدا باعا وزگەرمەگەن. ال باتىس قازاقستان وبلىسىنداعى باعا، ءتىپتى ءسال ارزانداعان (0،1%).
جىلدىق كورسەتكىشتە بەنزين قاتتى قىمباتتاعان وڭىرلەر – بقو (4،8%)، اقتوبە (4،1%) وبلىسى جانە شىمكەنت قالاسى (3،1%). باعا ەكپىنى ەڭ باسەڭ وڭىرلەر – الماتى قالاسى (0،9%)، اقمولا (1،1%) جانە جەتىسۋ (1،7%) وبلىستارى.
قاي قالادا بەنزين قاتتى قىمبات؟
اي-92 بەنزينىنىڭ ورتاشا باعاسى – 205 تەڭگە. ەڭ قىمبات باعا پەتروپاۆلدا تىركەلىپ وتىر: 209 تەڭگە، ەڭ ارزان باعا اتىراۋعا تيەسىلى: 195 تەڭگە.
اي-95/96 ماركالى بەنزيننىڭ ورتاشا باعاسى – 264 تەڭگە. ەڭ جوعارى باعا تالدىقورعاندا (274 تەڭگە)، ەڭ تومەن باعا – اتىراۋدا (243 تەڭگە) تىركەلگەن.
اي-98 بەنزينى الماتىدا قاتتى قىمبات – 315 تەڭگە، ال ەڭ ارزانى اقتوبەدە ەكەن: 283 تەڭگە.
قازاقستان جانار-جاعارمايمەن ءوزىن تولىق قامتاماسىز ەتە الىپ وتىر ما؟
جىل باسىنان بەرى قازاقستان ىشكى نارىقتاعى جانار-جاعارمايعا دەگەن سۇرانىستى تولىقتاي دەرلىك ءوزى قامتاماسىز ەتىپ وتىر. ەلىمىزدە قاڭتار-اقپان ايلارىندا 1،1 ملن توننا بەنزين وندىرىلسە، بۇل - بىلتىرعى جىلمەن سالىستىرعاندا 20،8%-عا كوپ كولەم.
بەنزين يمپورتى، كەرىسىنشە 8،1%-عا ازايىپ، بار-جوعى 101،8 توننانى قۇرادى. ال قازاقستاننىڭ ءوزى وسى كەزەڭدە 6،7 مىڭ توننا بەنزين ەكسپورتتاپ، تۇگەلىمەن وزبەكستان نارىعىنا وتكىزگەن.
"بەنزين باعاسىنىڭ كوتەرىلۋى الداعى ۋاقىتتا كولىك قىزمەتتەرى مەن جالپى نارىقتاعى باسقا تاۋارلار باعاسىنا اسەر ەتۋى ىقتيمال. سەبەبى بەنزيننىڭ ءاربىر تەڭگەگە قىمباتتاۋى – تۇپتەپ كەلگەندە، قاراپايىم حالىقتىڭ قالتاسىنا تۇسەتىن قوسىمشا سالماق"، - دەيدى ساراپشىلار.
بۇعان دەيىن سايتىمىزدا "بۇل ءالى باسى". بىرنەشە وڭىردە جانار-جاعارماي باعاسى قىمباتتاپ ۇلگەردى" دەگەن ماتەريال جاريالانعان بولاتىن. سونداي-اق بىزدەگى "مەملەكەتتىك رەتتەۋ الىنىپ، جانار-جاعارماي مەن ديزەل وتىنىنىڭ باعالارى ەركىنە جىبەرىلدى" دەگەن ماقالامەن دە تانىسا وتىرىڭىزدار. بيىل قاڭتار ايىندا ەنەرگەتيكا ءمينيسترى الماس ساتقالييەۆ جانار-جاعارماي باعاسى اقپاننان باستاپ قىمباتتايتىنىن،بۇل تاۋار ءتۇرى جىل سوڭىنا دەيىن شامالىلاپ ۇستەمە باعا قوسىپ وتىراتىنىن ايتقان ەدى.
