Qurylys salasyn damytý máseleleri qaralyp jatqan Úkimet otyrysynda premer-ministr Oljas Bektenov qurylys indýstriiasy – el ekonomikasyndaǵy negizgi salalardyń biri ekenin, onyń turǵyn úimen qamtý, infraqurylymdy damytý jáne jumys oryndaryn qurýǵa tikelei áser etetinin atap ótti, dep jazady Dalanews.kz.
"Memleket basshysy 2029 jylǵa deiin jańadan 111 mln sharshy metr turǵyn úi salý mindetin qoidy. Bul mindet júieli negizde jáne kezeń-kezeńimen oryndalýy tiis. Biz ótken jyly Turǵyn úi-kommýnaldyq infraqurylymdy damytý tujyrymdamasyn qaita qaradyq. Onda azamattardyń turǵyn úi jaǵdaiyn jaqsartýǵa baǵyttalǵan aýqymdy is-sharalar qamtylǵan. Qazirgi tańda nátijesi jaman emes. Jańa turǵyn úi qurylysy jyl saiyn ulǵaiyp keledi. Biyl Úkimet atalǵan sektordy odan ári yntalandyrý maqsatynda qosymsha sharalardy iske asyrdy. Atap aitqanda, Turǵyn úi saiasatyn reformalaý týraly zań qabyldandy. Ol baspanamen qamtamasyz etýdiń ashyq ári túsinikti júiesin qurýǵa múmkindik beredi. Sonymen qatar jańa jeńildetilgen ipotekalyq baǵdarlamalar iske qosylyp, qarjylandyrý kólemi artty", dep atap ótti Oljas Bektenov.
Úkimet otyrysynda premer-ministr baspana kezeginde turǵandardyń qoldanystaǵy tizimin ózektendirý máselesine nazar aýdardy.
"Men tizimderdi túgendep, bir júiege keltirýdi tapsyrǵan bolatynmyn. Biraq, bul jumys áli aiaqtalǵan joq. Sondyqtan ony tezdetý kerek. Baspana kezeginde, shynymen muqtaj azamattar ǵana bolý kerek", — deidi bul rette Úkimet basshysy.
Premer-ministr qurylys salasynda jańa nysandar salý jáne qajetti infraqurylymmen qamtamasyz eti boiynsha úilestirilgen jumystyń mańyzdylyǵyn basa aitty. Sonymen qatar, qurylys sapasyna erekshe nazar aýdarý kerek.
"Sońǵy jyldary ereje talaptarynyń buzylýyna jáne qurylys nysandarynyń ýaqtyly iske qosylmaýyna qatysty shaǵymdar sany kóbeiip barady. Bul máselelerdi júieli túrde sheshý qajet. Jańa Qurylys kodeksiniń jobasynda qurylys sapasyna baqylaýdy kúsheitý, salany tsifrlandyrý, sáýlettik qadaǵalaýdyń tiimdiligin arttyrý boiynsha sharalar kesheni kózdeldi", — dep atap ótti ol.
Úkimet otyrysy barysynda premer-ministr úlestik qurylys salasyndaǵy normativtik retteý qajettigine nazar aýdardy.
"Kóptegen qurylys kompaniialary zań talaptaryn ainalyp ótip, úleskerlerdiń qarajatyn tartýdy jalǵastyryp keledi. Olarmen eshqandai kepildik bermesten shartqa otyrady. Qazir Májilis úlestik qurylys máseleleri jónindegi zań jobasyn ázirledi. Ministrlik depýtattarmen birge úleskerler qarajatyn tartý isine baqylaýdy kúsheitý normalaryn sapaly pysyqtaýy qajet. Buǵan qosa, úlestik qurylysqa qatysty shartqa otyrý tetigin ázirleýdi tapsyramyn. Ol azamattarymyz úshin táýekelderdi tolyǵymen joiýǵa tiis", — dep atap ótti Oljas Bektenov.
Sondai-aq Premer-ministr kelesidei tapsyrmalar berdi:
- Ónerkásip jáne qurylys ministrligi óńir ákimdikterimen birlesip, turǵyn úiler men injenerlik jelilerdi iske qosýdyń biylǵy jáne 2025 jylǵa arnalǵan josparlarynyń oryndalýyn qamtamasyz etsin;
- jańa ipotekalyq baǵdarlamalardy jáne qurylystyń boljamdy ósimin eskere otyryp, jaýapty ministrlik memlekettik organdarmen jáne uiymdarmen birlesip, qurylys jáne kommýnaldyq sektorlar jobalaryndaǵy otandyq materialdar úlesin arttyrýyn qamtamasyz etsin. Sondai-aq qurylys materialdaryn óndirý boiynsha josparlanǵan jobalardy 2025 jyly iske qosý qajet;
- Ǵylym jáne joǵary bilim, Oqý-aǵartý, Ónerkásip jáne qurylys, Eńbek ministrlikterine naryqtyń suranysyn eskere otyryp, osy mamandardy daiarlaý máselelerin pysyqtaýy qajet – 2030 jylǵa deiin qurylys salasyna 200 myńnan astam bilikti maman qajet bolady.
Aldynda Joǵarǵy sottyń sheshimine narazylyǵyn bildirgen "Er-Taý”"kompaniiasynyń basshysy kranǵa shyǵyp, biikten sekirmek bolǵanyn jazǵanbyz.
