Úkimettegi brifing barysynda Úkimet basshysy Oljas Bektenovke kópti, ásirese kásipkerlerin qaýymyn alańdatqan aldaǵy qosymsha qun salyǵyna qatysty taǵy suraq qoiyldy. Ol bul rette Bendjamin Franklinniń qanatty sózin alǵa tarta otyryp, salyq mólsheriniń artýy eldegi iskerlik belsendilik pen biznes klimatqa keri áser etpeýi tiis ekenin jetkizdi, dep habarlaidy Dalanews.kz.
"Jańa Salyq kodeksi, ózderińiz biletindei, qosymsha qun salyǵyn (QQS) 16%-ǵa deiin arttyrýdy qarastyrady. Árine, salyqty arttyrý degenimiz – halyq úshin únemi jaisyz ári aýyr sheshim, biraq ol – májbúrli shara. Atalǵan reformanyń arqasynda biýdjetke qosymsha tabys túsedi jáne sonyń esebinen biz ekonomikanyń damý qarqynyn arttyratyn bolamyz. Ekonomika damýy úshin, eń aldymen, sapaly infraqurylym qajet, al infraqurylym biýdjettiń qoldaýynsyz qalyptaspaidy", - dedi ol.
Premer-ministrdiń aitýynsha, qazir Qazaqstandaǵy biýdjet deńgeiiniń damý úrdisi óte tómen. Ol ekonomikanyń ósýine ilese almai jatyr, sonyń saldarynan eldegi infraqurylym talapqa sai qarqynmen damymaýda.
"Jańa Salyq kodeksi qabyldanǵannan keiin 2026 jyldan bastap biýdjetke qosymsha kiris túsedi. Sonyń nátijesinde damytý biýdjeti qazirgi 8%-dyq deńgeiinen 18%-ǵa deiin ulǵaiady. Iaǵni, biz damý biýdjetiniń úlesin eki eseden astam arttyrýdy josparlap otyrmyz", – dedi Oljas Bektenov.
Onyń pikirinshe, bul shara ekonomikanyń turaqty damýyn qamtamasyz etýge múmkindik beredi.
"Árine, salyq kóleminiń ósimi eshqashan syrtqy taraptan qoldaýǵa ie bolǵan emes. Biraq bul máselede biznes, memleket jáne qoǵam múddeleri arasynda tepe-teńdik ustaý óte mańyzdy. Bendjamin Franklinniń "Bul ómirde tek eki nársege talas joq – ólim men salyq" degen ataqty qanatty sózi bar ǵoi. Ókinishke qarai, bizdegi jaǵdai solai. Biz óz tarapymyzdan salyq ósimi kásipkerlik belsendilikke jáne biznes klimatqa keri áser etpeýi úshin barlyq sharalardy qabyldaimyz. Bizdiń esebimiz boiynsha, sondai qatty keri áser bolmaidy", – dep sendiredi Premer-ministr.
Buǵan deiin Oljas Bektenov "ulttyq valiýta devalvatsiiaǵa ushyraidy" deýge esh negiz joq ekenin aitqan bolatyn.
