Bas prokýratýra Aqtaý mańyndaǵy ushaq apatyn tergeý úshin vedomstvoaralyq tergeý-operativtik top qurylǵanyn málimdedi, dep habarlaidy Dalanews.kz.
“Bas prokýratýra Aqtaý qalasy mańynda Ázerbaijan áýe kompaniiasynyń áýe kemesi apaty faktisi boiynsha Bas prokýratýranyń arnaiy prokýrorlarynyń basshylyǵymen vedomstvoaralyq tergeý-operativtik top qurylǵanyn habarlaidy. Onyń quramyna kólik prokýratýrasynyń, IIM jáne TJM tájiribeli qyzmetkerleri kirdi”, - delingen habarlamada.
Oqiǵa ornyna úkimettik komissiia quramynda eldiń Bas kólik prokýrory bardy.
Qylmystyq is Qazaqstan Respýblikasy Bas Prokýrorynyń erekshe baqylaýynda.
Aita keteiik, buǵan deiin Aqtaý mańyndaǵy ushaq apatynan aman qalǵandar sany 28 adamǵa jetkeni belgili bolǵan edi. Zardap shekkender ártúrli dárejedegi meditsinalyq mekemelerge jetkizilgen.
"Olarǵa oblystyń aýrýhanalarynda barlyq qajetti meditsinalyq kómek kórsetilýde. Oqiǵa ornyna 23 jedel meditsinalyq járdem brigadasy jumyldyryldy. Búgin Astanadan Aqtaýǵa quramynda hirýrgtar, travmatologtar bar mamandar brigadasymen sanitariialyq aviatsiia borty ushady", - delingen Densaýlyq habarlamada.
Sonymen qatar ushaqta bolǵan adamdardyń tizimi jariialandy.
Eske salaiyq, búgin, 25 jeltoqsanda Aqtaý mańynda ushaq qulady. Osyǵan bailanysty TJM túsinikteme berdi.
"Aqtaýda ushaq qulaǵan orynǵa Qazaqstan TJM jeke quramynan 52 adam jáne 11 birlik tehnikasy bardy. Oqiǵa ornyna kelgen boida áýe kemesi janyp jatty. Qutqarý bólimsheleri órtti sóndirýge kiristi".
"Qazaeronavigatsiia" aqparatynsha, Baký-Groznyi baǵyty boiynsha kele jatqan "Embrair190" AHY8243 ushaǵy Aqtaýda quspen soqtyǵysqan.
Al ázerbaijandyq BAQ-tyń habarlaýynsha, bortta 67 adam men 5 ekipaj múshesi bolǵan.
