باس پروكۋراتۋرا اقتاۋ ماڭىنداعى ۇشاق اپاتىن تەرگەۋ ءۇشىن ۆەدومستۆوارالىق تەرگەۋ-وپەراتيۆتىك توپ قۇرىلعانىن مالىمدەدى، دەپ حابارلايدى Dalanews.kz.
“باس پروكۋراتۋرا اقتاۋ قالاسى ماڭىندا ازەربايجان اۋە كومپانياسىنىڭ اۋە كەمەسى اپاتى فاكتىسى بويىنشا باس پروكۋراتۋرانىڭ ارنايى پروكۋرورلارىنىڭ باسشىلىعىمەن ۆەدومستۆوارالىق تەرگەۋ-وپەراتيۆتىك توپ قۇرىلعانىن حابارلايدى. ونىڭ قۇرامىنا كولىك پروكۋراتۋراسىنىڭ، ءىىم جانە تجم تاجىريبەلى قىزمەتكەرلەرى كىردى”، - دەلىنگەن حابارلامادا.
وقيعا ورنىنا ۇكىمەتتىك كوميسسيا قۇرامىندا ەلدىڭ باس كولىك پروكۋرورى باردى.
قىلمىستىق ءىس قازاقستان رەسپۋبليكاسى باس پروكۋرورىنىڭ ەرەكشە باقىلاۋىندا.
ايتا كەتەيىك، بۇعان دەيىن اقتاۋ ماڭىنداعى ۇشاق اپاتىنان امان قالعاندار سانى 28 ادامعا جەتكەنى بەلگىلى بولعان ەدى. زارداپ شەككەندەر ءارتۇرلى دارەجەدەگى مەديسينالىق مەكەمەلەرگە جەتكىزىلگەن.
"ولارعا وبلىستىڭ اۋرۋحانالارىندا بارلىق قاجەتتى مەديسينالىق كومەك كورسەتىلۋدە. وقيعا ورنىنا 23 جەدەل مەديسينالىق جاردەم بريگاداسى جۇمىلدىرىلدى. بۇگىن استانادان اقتاۋعا قۇرامىندا حيرۋرگتار، تراۆماتولوگتار بار ماماندار بريگاداسىمەن سانيتاريالىق اۆياسيا بورتى ۇشادى"، - دەلىنگەن دەنساۋلىق حابارلامادا.
سونىمەن قاتار ۇشاقتا بولعان ادامداردىڭ ءتىزىمى جاريالاندى.
ەسكە سالايىق، بۇگىن، 25 جەلتوقساندا اقتاۋ ماڭىندا ۇشاق قۇلادى. وسىعان بايلانىستى تجم تۇسىنىكتەمە بەردى.
"اقتاۋدا ۇشاق قۇلاعان ورىنعا قازاقستان تجم جەكە قۇرامىنان 52 ادام جانە 11 بىرلىك تەحنيكاسى باردى. وقيعا ورنىنا كەلگەن بويدا اۋە كەمەسى جانىپ جاتتى. قۇتقارۋ بولىمشەلەرى ءورتتى سوندىرۋگە كىرىستى".
"قازاەروناۆيگاسيا" اقپاراتىنشا، باكۋ-گروزنىي باعىتى بويىنشا كەلە جاتقان "ەمبراير190" AHY8243 ۇشاعى اقتاۋدا قۇسپەن سوقتىعىسقان.
ال ازەربايجاندىق باق-تىڭ حابارلاۋىنشا، بورتتا 67 ادام مەن 5 ەكيپاج مۇشەسى بولعان.
