Májilis depýtaty, belgili saiasatker Ermurat Bapi Eski Qazaqstan bir ǵana Nazarbaev emes ekenin aitty, - dep habarlaidy
"Eski Qazaqstan degende bul júie bir Nazarbaevpen ǵana ólshenbeidi. Nazarbaevtyń otyz jyl boiy qurǵan júiesi ǵoi. Árbir satysynda, árbir buryshynda, árbir deńgeiinde shegelenip qatyp qalǵan biýrokratiialyq, avtoritarlyq biliktiń sheneýnikteri nemese sondai fýnktsiialyq mindetter atqaratyn laýazymdar bar. Sondyqtan bir Nazarbaev pensiiaǵa ketti eken dep bári ózgere qalǵan joq. Óitkeni qalyptasqan júieden ózgerip, Jańa Qazaqstanǵa laiyqtap, sanada ózgerister bolýy kerek. Qujatpen ózgerte salýǵa bolady. ...Sońǵy eki jyldyń ishinde, Qańtardan keiin biraz tazalandy (eski Qazaqstannyń "sara jolyn ustanatyndar" - esk.). Men ózim baiqap júrmin. Biliktiń apparatynda, bilik basynda otyrǵan laýazymgerler biraz tazalandy. Byltyrǵy kúzdegi Úkimettegi aýys-túiisten keiin, biylǵy aýys-túiisten keiin, odan keiingi premer-ministr aýysty, sodan keiin tazalaný biraz júrdi. Degenmen orta býyn, negizgi jumysty atqaratyn saiasi tulaǵalar, ministr, ákim degender saiasi laýazym ǵoi. Qańtardan keiin ákimder, ministrler tolyq ózgerdi. Eskiden qalǵan biren-saran bireýler bolmasa, barlyǵy ózgerdi. Biraq másele adamnyń ózgerýinde emes, sananyń ózgerýinde", - dedi ol.
Sonymen qatar, depýtat Nazarbaevtyń qazir qanshalyq yqpaly bar ekenin de aitty.
"Saiasi turǵyda yqpaly bolmasa da, Qańtardan keiin ol saiasi pármeniniń qudiretinen aiyryldy. Biraq ekonomikalyq, qarjylyq turǵyda, aktivter turǵysynda áli de yqpaly bar dep oilaimyn", - dedi saiasatker.
Ermurat Bapi Nazarbaev týraly qazir oiy qandai ekenin aitty.
"Ol men úshin pensioner. ...Bizdiń eldi otyz jyl basqaryp, eń bastysy Nazarbaevtyń avtoritarlyq biligi Qazaqstanda qazaq halqynyń erik-jigerin janshyǵan, qum qylǵan. Avtoritarly bilik iesi boldy. Qazir Nazarbaevtyń bilik zamanynyń jemisin jep jatyrmyz. Eń bastysy qoǵam, halyq qiyndyqtarda toqyraýǵa tap bolǵany, rýhani turǵyda toqyraýǵa tap bolǵany, aýyldyń qalaǵa dúrkirei kóshýi, jumyssyzdyq, ádiletsiz jekeshelendirý, jeke basqa tabyný degen siiaqty júie qoǵamda izin salyp ketti. Nazarbaevtyń otyz jylǵy biligin saralai kelgende mindetti túrde halyqtyq jaýapqa tartylýy kerek adam. Ol jaýap berýi kerek. Halyqtyń aldynda esep berýi kerek. Ol aldy da ketti. Kóptegen másele jóninde ony jaýapqa shaqyrý kerek", - dedi depýtat.
