Qazaqstannyń Saýda jáne integratsiia ministrligi AQSh-tyń birqatar taýarǵa jańa kedendik baj engizýine qatysty pikir bildirdi, – dep habarlaidy Dalanews.kz.
Ministrlik málimetinshe, AQSh tarapynan qabyldanǵan jańa saýda sharalaryn aldyn ala taldaý nátijesinde Qazaqstannan AQSh-qa eksporttalatyn taýardyń eleýli bóligine qosymsha tarifterdiń áseri bolmaityny anyqtalǵan.
Óitkeni olar AQSh ákimshiliginiń normativtik aktilerinde kózdelgen erekshelikter tizimine engizilgen.
Ulttyq statistika biýrosynyń málimetteri boiynsha 2024 jyldyń nátijesi boiynsha Qazaqstan men AQSh arasyndaǵy taýar ainalymy 4,2 mlrd AQSh dollary bolǵan, bul ótken jylmen salystyrǵanda 4%-ǵa artyq (4,1 mlrd AQSh dollary).
Qazaqstannyń AQSh-qa eksport kólemi 2024 jyly 30,6%-ǵa artyp, 2,0 mlrd AQSh dollary boldy. AQSh-tan Qazaqstanǵa import kólemi 2,2 mlrd AQSh dollary boldy.
"Qazaqstannan AQSh-qa eksporttalatyn negizgi taýarlar — shiki munai, ýran, kúmis, ferrosplavtar jáne basqa da taýarlar. Bul sanattaǵy ónimder AQSh Prezidentiniń "Taýarlar saýdasyndaǵy mańyzdy jáne turaqty tapshylyqty joiý maqsatynda ózara tarifter arqyly importty retteý týraly" Jarlyǵy boiynsha erekshelikter tizimine engizilgen taýarlardyń 92 %-y bolady", - dep jazylǵan habarlamada.
Saýda ministrligi qosymsha bajdar belgili bir taýar túrlerine engiziletinin málimdedi.
"Bul sanattaǵy taýarlardyń eksport kólemi byltyr 95,2 mln AQSh dollary boldy. Olardyń ishinde — fosfor (2024 jyly eksport kólemi 15,9 mln AQSh dollary), ferrosilitsii (12,7 mln AQSh dollary), linzalar (4,1 mln AQSh dollary), bidai kleikovinasy (4 mln AQSh dollary), ammonii nitraty (2,4 mln AQSh dollary). Qabyldanǵan tariftik sharalar Qazaqstannyń AQSh-qa jalpy eksportynyń tek 4,8%-yna ǵana áser etedi", - dedi ministrlik ókilderi.
Qazaqstan tarapy qandai sharalar josparlanyp otyrǵanyn da aitty.
"Úkimet Qazaqstanǵa qatysty qosymsha bajdardy qoldanbaý múmkindigin talqylaý úshin AQSh tarapymen konsýltatsiialar júrgizýge nietti.
Qazaqstan 10 jyl boiy Dúniejúzilik saýda uiymynyń (DSU) múshesi bolyp keledi jáne syrtqy saýda saiasatyn júzege asyrýda uiymnyń printsipterin qatań ustanady. AQSh-pen ekijaqty yntymaqtastyq aiasynda Qazaqstan halyqaralyq mindettemelerge sáikes saýdada teń jáne kemsitýshilikke jol bermeitin jaǵdailardy qamtamasyz etedi", - dep jazylǵan habarlamada.
Aita keteiik, buǵan deiin AQSh prezidenti Donald Tramp 185 elge, sonyń ishinde Qazaqstanǵa baj salyǵyn engizetini habarlandy.
