Қазақстанның Сауда және интеграция министрлігі АҚШ-тың бірқатар тауарға жаңа кедендік баж енгізуіне қатысты пікір білдірді, – деп хабарлайды Dalanews.kz.

Министрлік мәліметінше, АҚШ тарапынан қабылданған жаңа сауда шараларын алдын ала талдау нәтижесінде Қазақстаннан АҚШ-қа экспортталатын тауардың елеулі бөлігіне қосымша тарифтердің әсері болмайтыны анықталған.

Өйткені олар АҚШ әкімшілігінің нормативтік актілерінде көзделген ерекшеліктер тізіміне енгізілген.

Ұлттық статистика бюросының мәліметтері бойынша 2024 жылдың нәтижесі бойынша Қазақстан мен АҚШ арасындағы тауар айналымы 4,2 млрд АҚШ доллары болған, бұл өткен жылмен салыстырғанда 4%-ға артық (4,1 млрд АҚШ доллары).

Қазақстанның АҚШ-қа экспорт көлемі 2024 жылы 30,6%-ға артып, 2,0 млрд АҚШ доллары болды. АҚШ-тан Қазақстанға импорт көлемі 2,2 млрд АҚШ доллары болды.

"Қазақстаннан АҚШ-қа экспортталатын негізгі тауарлар — шикі мұнай, уран, күміс, ферросплавтар және басқа да тауарлар. Бұл санаттағы өнімдер АҚШ Президентінің "Тауарлар саудасындағы маңызды және тұрақты тапшылықты жою мақсатында өзара тарифтер арқылы импортты реттеу туралы" Жарлығы бойынша ерекшеліктер тізіміне енгізілген тауарлардың 92 %-ы болады", - деп жазылған хабарламада.

Сауда министрлігі қосымша баждар белгілі бір тауар түрлеріне енгізілетінін мәлімдеді.

"Бұл санаттағы тауарлардың экспорт көлемі былтыр 95,2 млн АҚШ доллары болды. Олардың ішінде — фосфор (2024 жылы экспорт көлемі 15,9 млн АҚШ доллары), ферросилиций (12,7 млн АҚШ доллары), линзалар (4,1 млн АҚШ доллары), бидай клейковинасы (4 млн АҚШ доллары), аммоний нитраты (2,4 млн АҚШ доллары). Қабылданған тарифтік шаралар Қазақстанның АҚШ-қа жалпы экспортының тек 4,8%-ына ғана әсер етеді", - деді министрлік өкілдері.

Қазақстан тарапы қандай шаралар жоспарланып отырғанын да айтты.

"Үкімет Қазақстанға қатысты қосымша баждарды қолданбау мүмкіндігін талқылау үшін АҚШ тарапымен консультациялар жүргізуге ниетті.

Қазақстан 10 жыл бойы Дүниежүзілік сауда ұйымының (ДСҰ) мүшесі болып келеді және сыртқы сауда саясатын жүзеге асыруда ұйымның принциптерін қатаң ұстанады. АҚШ-пен екіжақты ынтымақтастық аясында Қазақстан халықаралық міндеттемелерге сәйкес саудада тең және кемсітушілікке жол бермейтін жағдайларды қамтамасыз етеді", - деп жазылған хабарламада.

Айта кетейік, бұған дейін АҚШ президенті Дональд Трамп 185 елге, соның ішінде Қазақстанға баж салығын енгізетіні хабарланды.