قازاقستاننىڭ ساۋدا جانە ينتەگراسيا مينيسترلىگى اقش-تىڭ ءبىرقاتار تاۋارعا جاڭا كەدەندىك باج ەنگىزۋىنە قاتىستى پىكىر ءبىلدىردى، – دەپ حابارلايدى Dalanews.kz.

مينيسترلىك مالىمەتىنشە، اقش تاراپىنان قابىلدانعان جاڭا ساۋدا شارالارىن الدىن الا تالداۋ ناتيجەسىندە قازاقستاننان اقش-قا ەكسپورتتالاتىن تاۋاردىڭ ەلەۋلى بولىگىنە قوسىمشا تاريفتەردىڭ اسەرى بولمايتىنى انىقتالعان.

ويتكەنى ولار اقش اكىمشىلىگىنىڭ نورماتيۆتىك اكتىلەرىندە كوزدەلگەن ەرەكشەلىكتەر تىزىمىنە ەنگىزىلگەن.

ۇلتتىق ستاتيستيكا بيۋروسىنىڭ مالىمەتتەرى بويىنشا 2024 جىلدىڭ ناتيجەسى بويىنشا قازاقستان مەن اقش اراسىنداعى تاۋار اينالىمى 4،2 ملرد اقش دوللارى بولعان، بۇل وتكەن جىلمەن سالىستىرعاندا 4%-عا ارتىق (4،1 ملرد اقش دوللارى).

قازاقستاننىڭ اقش-قا ەكسپورت كولەمى 2024 جىلى 30،6%-عا ارتىپ، 2،0 ملرد اقش دوللارى بولدى. اقش-تان قازاقستانعا يمپورت كولەمى 2،2 ملرد اقش دوللارى بولدى.

"قازاقستاننان اقش-قا ەكسپورتتالاتىن نەگىزگى تاۋارلار — شيكى مۇناي، ۋران، كۇمىس، فەرروسپلاۆتار جانە باسقا دا تاۋارلار. بۇل ساناتتاعى ونىمدەر اقش پرەزيدەنتىنىڭ "تاۋارلار ساۋداسىنداعى ماڭىزدى جانە تۇراقتى تاپشىلىقتى جويۋ ماقساتىندا ءوزارا تاريفتەر ارقىلى يمپورتتى رەتتەۋ تۋرالى" جارلىعى بويىنشا ەرەكشەلىكتەر تىزىمىنە ەنگىزىلگەن تاۋارلاردىڭ 92 %-ى بولادى"، - دەپ جازىلعان حابارلامادا.

ساۋدا مينيسترلىگى قوسىمشا باجدار بەلگىلى ءبىر تاۋار تۇرلەرىنە ەنگىزىلەتىنىن مالىمدەدى.

"بۇل ساناتتاعى تاۋارلاردىڭ ەكسپورت كولەمى بىلتىر 95،2 ملن اقش دوللارى بولدى. ولاردىڭ ىشىندە — فوسفور (2024 جىلى ەكسپورت كولەمى 15،9 ملن اقش دوللارى)، فەرروسيليسيي (12،7 ملن اقش دوللارى)، لينزالار (4،1 ملن اقش دوللارى)، بيداي كلەيكوۆيناسى (4 ملن اقش دوللارى)، اممونيي نيتراتى (2،4 ملن اقش دوللارى). قابىلدانعان تاريفتىك شارالار قازاقستاننىڭ اقش-قا جالپى ەكسپورتىنىڭ تەك 4،8%-ىنا عانا اسەر ەتەدى"، - دەدى مينيسترلىك وكىلدەرى.

قازاقستان تاراپى قانداي شارالار جوسپارلانىپ وتىرعانىن دا ايتتى.

"ۇكىمەت قازاقستانعا قاتىستى قوسىمشا باجداردى قولدانباۋ مۇمكىندىگىن تالقىلاۋ ءۇشىن اقش تاراپىمەن كونسۋلتاسيالار جۇرگىزۋگە نيەتتى.

قازاقستان 10 جىل بويى دۇنيەجۇزىلىك ساۋدا ۇيىمىنىڭ (دسۇ) مۇشەسى بولىپ كەلەدى جانە سىرتقى ساۋدا ساياساتىن جۇزەگە اسىرۋدا ۇيىمنىڭ پرينسيپتەرىن قاتاڭ ۇستانادى. اقش-پەن ەكىجاقتى ىنتىماقتاستىق اياسىندا قازاقستان حالىقارالىق مىندەتتەمەلەرگە سايكەس ساۋدادا تەڭ جانە كەمسىتۋشىلىككە جول بەرمەيتىن جاعدايلاردى قامتاماسىز ەتەدى"، - دەپ جازىلعان حابارلامادا.

ايتا كەتەيىك، بۇعان دەيىن اقش پرەزيدەنتى دونالد ترامپ 185 ەلگە، سونىڭ ىشىندە قازاقستانعا باج سالىعىن ەنگىزەتىنى حابارلاندى.