Jetisý oblysynda apelásıalyq sot Aızat Jumanovanyń ólimine qatysty qylmystyq isti qaraıdy. Jábirlenýshi tarap sottalǵan adamǵa taǵaıyndalǵan jazany qatańdatýdy talap etip otyr, dep habarlaıdy Dalanews.kz.

Bul týraly jábirlenýshi taraptyń múddesin qorǵap otyrǵan advokattardyń biri habarlady. Olar isti neǵurlym aýyr bap boıynsha qaıta saralaý qajet ekenin alǵa tartyp otyr.

Áńgime kúıeýi soqqyǵa jyǵyp, sonyń saldarynan qaza tapqan jas áıel Aızat Jumanovanyń ólimine baılanysty qozǵalǵan qylmystyq is týraly bolyp otyr.

İs apelásıalyq satynyń óndirisine qabyldanǵan. Sot otyrysy 25 aqpanǵa belgilengen.

«Birinshi satydaǵy sotta-aq biz bul istiń Qylmystyq kodekstiń 99-babynyń 1-bóligimen emes, erekshe qatygezdikpen jasalǵan adam óltirý retinde, ıaǵnı osy baptyń 2-bóligi boıynsha qaralýy tıis ekenin aıtqanbyz. Tıisti dálelderdi de usyndyq. Alaıda sot ony eskermedi, prokýratýra da tıisti deńgeıde áreket etpedi. Biz istiń mán-jaıy men saldary qatańyraq quqyqtyq baǵa berýdi talap etedi dep esepteımiz. Aıyptalýshynyń áreketi Qylmystyq kodekstiń 99-babynyń 2-bóligi boıynsha, ıaǵnı 15 jyldan 20 jylǵa deıin nemese ómir boıyna bas bostandyǵynan aıyrýdy kózdeıtin norma aıasynda qaralýy kerek», - dedi jábirlenýshi taraptyń advokaty Zarına Meırembaeva.

Eske salaıyq, bıyl 9 qańtarda sot Aıbar Janbolatty Qylmystyq kodekstiń 99-babynyń 1-bóligi boıynsha kináli dep tanyp, oǵan ortasha qaýipsizdik mekemesinde 14 jyl bas bostandyǵynan aıyrý jazasyn taǵaıyndaǵan bolatyn.