Bul týraly Jarma aýdany ákimi Ahmetqali Nurǵojin áleýmettik-ekonomikalyq damýy týraly esebinde málimdedi.
- Aýdanda álemdik pandemiiaǵa bailanysty qiyndyqtarǵa qaramastan, sońǵy úsh jylda ónerkásip ónimderin óndirý 29 ese ósti. Atalmysh sala boiynsha aýdanymyz oblysta Óskemen qalasynan keiingi ekinshi oryndy alady. Aita keteiik, halyqty áleýmettik qorǵaý salasynda 2020 jyly 1315 jańa jumys orny ashyldy. Aýdan halqynyń 96% taza aýyz sýmen qamtamasyz etildi. 15 bilim berý uiymynda jergilikti biýdjet qarajaty esebinen beinebaqylaý kameralary ornatyldy. 12 mektepte balalardyń qaýipsizdigi men qolailylyǵy úshin ǵimarat ishinde sanitarlyq jeli júrgizildi, – dedi aýdan ákimi.
Jarma aýdany ákiminiń aitýynsha, Kishi Qarasý aýylynda sý qubyryn salý jáne Sulýsary men Jaryq aýyldaryn taza aýyz sýmen qamtamasyz etý jumystary aiaqtalady. Sondai – aq, "Aýyl-el besigi" baǵdarlamasy aiasynda biyl Áýezov kentindegi Mádeniet úii paidalanýǵa berilip, Sýyqbulaq kentindegi aýyldyq klýbqa kúrdeli jóndeý jumystary júrgiziledi.
Aita ketý kerek, biyl burynǵy aýdan ortalyǵy – Shar qalasynyń infraqurylymyn abattandyrý jáne qaita jańartý boiynsha keshendi jospar ázirlenedi.
– Oblysta burynǵy aýdan ortalyqtaryn damytýǵa erekshe nazar aýdarylǵan. Eldi mekenderde áleýmettik infraqurylym saqtalǵan, halyq orta jáne mektepke deiingi bilim berý, densaýlyq saqtaý, mádeniet jáne sport qyzmetterimen qamtamasyz etilgen. Dese de, turǵyn úi-kommýnaldyq salada jáne jol infraqurylymynda birqatar máseleler bar. Ony sheshý úshin burynǵy aýdan ortalyqtaryn damytý baǵdarlamasy ázirlenedi. Memleket basshysy Qasym-Jomart Toqaevtyń "Ulttyq ekonomikanyń údemeli ósýinsiz azamattardyń ál-aýqatyn qamtamasyz etý múmkin emes» mindetine súiene otyryp, naqty sektordyń básekelestik artyqshylyqtaryn kúsheitý úshin jumys istep jatyrmyz, – dedi ShQO ákimi Danial Ahmetov.
Aita ketý kerek, ótken jyly Shar qalasynda kópten kútken sport kesheni paidalanýǵa berildi. Jalpy aýdanda jyl qorytyndysy boiynsha 48 kópbalaly otbasy turǵyn úimen qamtamasyz etilse, 2 páterli tórt turǵyn úi meditsina qyzmetkerlerine berildi.
- Aýdanymyzda dárigerlerge barynsha qoldaý kórsetilip jatyr. Jańa jyl qarsańynda jańa páterler syilaǵandaryńyz úshin barlyq áriptesterimniń atynan alǵys bildiremin. Óz tarapymyzdan halyq densaýlyǵy úshin aianbai eńbek etetin bolamyz, - dedi aýdandyq aýrýhana qyzmetkeri jáne kópbalaly ana Merýert Jadyqova.
