Qarjy ministri Mádi Tákiev 85 myń teńge kórsetkishiniń mánin túsindirip, ony eń tómengi kúnkóris deńgeii retinde qabyldaýǵa bolmaitynyn aitty. Alaida bul somanyń aýyl turǵyndarynyń negizgi qajettilikterin óteýge jetkilikti-jetkiliksiz ekeni týraly suraqqa naqty jaýap bermei, keiin depýtatqa túsinikteme berýden bas tartty, dep habarlaidy dalanews.kz.
Ministrdiń aitýynsha, 85 myń teńge kórsetkishin eń tómengi kúnkóris mólsheri retinde qabyldap, barlyq esepti soǵan negizdeýge bolmaidy.
«Eń tómengi kórsetkish – 85 000 teńge. Biraq barlyq esepti osy somaǵa tirep qoiýǵa bolmaidy. Bul kórsetkish ne úshin qajet? Mysaly, jalaqy eseptegen kezde belgili bir shegerim jasalady, sodan keiin salyq esepteledi. Bul eń tómengi kúnkóris mólsheri emes, jalpy esepteýlerde baǵdar retinde qoldanylatyn kórsetkish», – dedi Mádi Tákiev.
Osylaisha, ministr 85 myń teńgeniń halyqtyń kúndelikti qajettilikterin óteýge arnalǵan soma emes, esepteýlerde qoldanylatyn baǵdar ekenin túsindirdi.
Alaida aýyl turǵyndarynyń turmys deńgeiine qatysty suraq ashyq qaldy. Aýylda da azyq-túlik, dári-dármek, kiim-keshek pen kommýnaldyq qyzmetterge aqsha jumsalady. Sondyqtan kórsetkishtiń esepteýde qoldanylýy men onyń naqty ómir súrý shyǵyndaryna sáikestigi eki bólek másele.
Buǵan deiin Quryltai depýtaty Meiirhat Qasymbaev 85 myń teńge kólemindegi eń tómengi jalaqy aýyl turǵyndaryna jetýi múmkin ekenin, alaida qalada ómir súrýge jetkiliksiz ekenin aitqan bolatyn. Depýtattyń osy pikiri boiynsha Qarjy ministri Mádi Tákievten túsinikteme suraldy.
