قارجى مينيسترٸ مەدي تەكيەۆ 85 مىڭ تەڭگە كٶرسەتكٸشٸنٸڭ مەنٸن تٷسٸندٸرٸپ, ونى ەڭ تٶمەنگٸ كٷنكٶرٸس دەڭگەيٸ رەتٸندە قابىلداۋعا بولمايتىنىن ايتتى. الايدا بۇل سومانىڭ اۋىل تۇرعىندارىنىڭ نەگٸزگٸ قاجەتتٸلٸكتەرٸن ٶتەۋگە جەتكٸلٸكتٸ-جەتكٸلٸكسٸز ەكەنٸ تۋرالى سۇراققا ناقتى جاۋاپ بەرمەي, كەيٸن دەپۋتاتقا تٷسٸنٸكتەمە بەرۋدەن باس تارتتى, دەپ حابارلايدى dalanews.kz.
مينيستردٸڭ ايتۋىنشا, 85 مىڭ تەڭگە كٶرسەتكٸشٸن ەڭ تٶمەنگٸ كٷنكٶرٸس مٶلشەرٸ رەتٸندە قابىلداپ, بارلىق ەسەپتٸ سوعان نەگٸزدەۋگە بولمايدى.
«ەڭ تٶمەنگٸ كٶرسەتكٸش – 85 000 تەڭگە. بٸراق بارلىق ەسەپتٸ وسى سوماعا تٸرەپ قويۋعا بولمايدى. بۇل كٶرسەتكٸش نە ٷشٸن قاجەت? مىسالى, جالاقى ەسەپتەگەن كەزدە بەلگٸلٸ بٸر شەگەرٸم جاسالادى, سودان كەيٸن سالىق ەسەپتەلەدٸ. بۇل ەڭ تٶمەنگٸ كٷنكٶرٸس مٶلشەرٸ ەمەس, جالپى ەسەپتەۋلەردە باعدار رەتٸندە قولدانىلاتىن كٶرسەتكٸش», – دەدٸ مەدي تەكيەۆ.
وسىلايشا, مينيستر 85 مىڭ تەڭگەنٸڭ حالىقتىڭ كٷندەلٸكتٸ قاجەتتٸلٸكتەرٸن ٶتەۋگە ارنالعان سوما ەمەس, ەسەپتەۋلەردە قولدانىلاتىن باعدار ەكەنٸن تٷسٸندٸردٸ.
الايدا اۋىل تۇرعىندارىنىڭ تۇرمىس دەڭگەيٸنە قاتىستى سۇراق اشىق قالدى. اۋىلدا دا ازىق-تٷلٸك, دەرٸ-دەرمەك, كيٸم-كەشەك پەن كوممۋنالدىق قىزمەتتەرگە اقشا جۇمسالادى. سوندىقتان كٶرسەتكٸشتٸڭ ەسەپتەۋدە قولدانىلۋى مەن ونىڭ ناقتى ٶمٸر سٷرۋ شىعىندارىنا سەيكەستٸگٸ ەكٸ بٶلەك مەسەلە.
بۇعان دەيٸن قۇرىلتاي دەپۋتاتى مەيٸرحات قاسىمباەۆ 85 مىڭ تەڭگە كٶلەمٸندەگٸ ەڭ تٶمەنگٸ جالاقى اۋىل تۇرعىندارىنا جەتۋٸ مٷمكٸن ەكەنٸن, الايدا قالادا ٶمٸر سٷرۋگە جەتكٸلٸكسٸز ەكەنٸن ايتقان بولاتىن. دەپۋتاتتىڭ وسى پٸكٸرٸ بويىنشا قارجى مينيسترٸ مەدي تەكيەۆتەن تٷسٸنٸكتەمە سۇرالدى.
