Қаржы министрі Мәди Тәкиев 85 мың теңге көрсеткішінің мәнін түсіндіріп, оны ең төменгі күнкөріс деңгейі ретінде қабылдауға болмайтынын айтты. Алайда бұл соманың ауыл тұрғындарының негізгі қажеттіліктерін өтеуге жеткілікті-жеткіліксіз екені туралы сұраққа нақты жауап бермей, кейін депутатқа түсініктеме беруден бас тартты, деп хабарлайды dalanews.kz.
Министрдің айтуынша, 85 мың теңге көрсеткішін ең төменгі күнкөріс мөлшері ретінде қабылдап, барлық есепті соған негіздеуге болмайды.
«Ең төменгі көрсеткіш – 85 000 теңге. Бірақ барлық есепті осы сомаға тіреп қоюға болмайды. Бұл көрсеткіш не үшін қажет? Мысалы, жалақы есептеген кезде белгілі бір шегерім жасалады, содан кейін салық есептеледі. Бұл ең төменгі күнкөріс мөлшері емес, жалпы есептеулерде бағдар ретінде қолданылатын көрсеткіш», – деді Мәди Тәкиев.
Осылайша, министр 85 мың теңгенің халықтың күнделікті қажеттіліктерін өтеуге арналған сома емес, есептеулерде қолданылатын бағдар екенін түсіндірді.
Алайда ауыл тұрғындарының тұрмыс деңгейіне қатысты сұрақ ашық қалды. Ауылда да азық-түлік, дәрі-дәрмек, киім-кешек пен коммуналдық қызметтерге ақша жұмсалады. Сондықтан көрсеткіштің есептеуде қолданылуы мен оның нақты өмір сүру шығындарына сәйкестігі екі бөлек мәселе.
Бұған дейін Құрылтай депутаты Мейірхат Қасымбаев 85 мың теңге көлеміндегі ең төменгі жалақы ауыл тұрғындарына жетуі мүмкін екенін, алайда қалада өмір сүруге жеткіліксіз екенін айтқан болатын. Депутаттың осы пікірі бойынша Қаржы министрі Мәди Тәкиевтен түсініктеме сұралды.
