Қазақстанда газ конденсатын есептемегенде, қыркүйекте мұнай өндіру тәулігіне 1,851 миллион баррельге жетті. Тамызда бұл көрсеткіш 1,830 миллион баррель болған еді. Бұл туралы ОПЕК-тің ай сайынғы есебінде жазылған, деп хабарлайды dalanews.kz.
ОПЕК+ келісімі аясында Қазақстанға қыркүйекте тәулігіне 1,628 миллион баррель мұнай өндіруге рұқсат етілген. Бұл көлем 2026 жылғы қазан мен қарашада да өзгеріссіз қалады.
ОПЕК+ елдері биыл жылдың басым бөлігінде мұнай өндіру квоталарын ай сайын арттырып отырды. Алайда жоспарланған өсімнің көбі іс жүзінде жүзеге аспады. Бұған Иран мен Украинадағы әскери қақтығыстардың Парсы шығанағы елдерінен, Ресейден және Қазақстаннан мұнай экспорттауға кедергі келтіруі себеп болған.
"Теңізшевройл" компаниясы 2025 жылы Теңіз кен орнындағы болашақ кеңейту жобасын аяқтағаннан кейін Қазақстанда мұнай өндіру көлемі ОПЕК+ келісімінде белгіленген шектен асып кетті.
Дереккөз мәліметінше, Қазақстанда мұнай мен газ конденсатын өндіру көлемі қыркүйекте 7,65 миллион тоннаға (тәулігіне 1,92 миллион баррель) дейін төмендеген. Тамызда бұл көрсеткіш 8,48 миллион тонна (тәулігіне 2,06 миллион баррель) болған.
Айта кетейік, 7 қыркүйек пен 1 қазан аралығында Қарашығанақ кен орнында жоспарлы жөндеу жұмыстары жүргізілді. Бұл кен орнындағы шикізат өндіру көлемі ОПЕК келісімі бойынша есепке алынбайды.
